Гьамусяат агьалйирин арайиъ варитIан гизаф гъягъюрайи улхбар коронавирусдиз аькси прививка апIбахъди аьлакьалудар ву. Саспидар думу руб йивуз разивалиинди гъягъюра, хъа бязидар, чпиз вакцинайин руб йивбакан суал тувиган, кIул тIубччвури, руб йивуз чпи рази дарувал улупури, суалнахьан гьудучIвура.
Коронавирусдиз аькси вакцинация вари Урусатдиъ гъизгъинди гъабхура. Бязи шагьрариъ, агьалйирин нубатар аьхю шулайивал гьисабназ гъадабгъну, прививка апIру пунктарин кьадарра артухъ апIура. Мисалназ, Санкт-Петербургдиъ февралин 10-пи йигъаз шагьрин агьалйири чпин хушниинди коронавирусдиз аькси вакцинайин прививка апIру пунктарин кьадар 120-дихьна хьиди. Гъийин йигъаз му шагьриъ 66 агъзур касди коронавирусдиз аькси прививка гъапIну. Дурарикан 15 агъзурихьна агьалйири прививкайин кьюбпи дозара кьабул дапIна. КIваин апIуз ккундузуз, прививка кьюб пайнакан ибарат шула. Сабпи руб дивну кьюб гьяфта гъябгъбан кьяляхъ, кьюбпи руб йивуру. Му къайда чIур дапIну ккундар.
Прививкайикан чан фикрар ачухъ апIури, Санкт-Петербургдиъ айи ихь ватанагьли, Александровский больницайин «уьру зонайин» медсестра Маисат Митаровайира вакцинайин важиблувал къайд гъапIнийи.
«Гьякьлуди кIурзачвуз, му уьзур ужуб дар. «Уьру зонайиъ» лихури, йис шулайиз. Гизаф инсанар коронавирусди уьмрихъ мягьрум гъапIувалин шагьидар гъахьунча. ГучI шлуб гьадму вуки, бязи дюшюшариъ духтрарин кюмек кьувватсуз шула. Йигъну саки сагъди айи кас гвачIин улубкьайиз гъагъи гьялназ гъюру дюшюшар шулу. Саб вахтна узура, узухъди «уьру зонайиъ» лихурайи швнур-сар духтирра гъагъиди иццру гъахьнийчу. Гъийин йигъаз ич больницайиъ лихурайи духтрарикан уьзур ктрубчIвдар прививка апIуз нубатнахъ дийигъна. Узу прививка дапIну ккунивалин терефкар вуза. Гьамусяаьт йиз ифдик аькси вирусдиз антителар кайиз. Хъа дурарин вахт ккудубкIган, узура прививка апIурза. Диди беден му гъагъи уьзрихьан уьбхюз кьувват тувру»,
– гъапну Маисат Митаровайи.
Хъа учву вакцинайихьна фици янашмиш шулачва? Му уьзриан аьзарлу гъахьидар ичв хулаъ вая багахьлуйирин, дустарин арайиъ айин? Ичв теклифар ва жавабар дидикIну, газатдин редакцияйиз хъадаай.
