Хъархъсарихьан Дагъустандин меркез – Мягьячгъала ва гьацира Каспийск шагьур марцц апIурайи «Лидер» региондин оператори ццийин йисан эвелиан мина чан вазифйир тамам апIури имдар. Гьаци вуйивализ лигну, му кьюбиб шагьрар урслариз ухшар духьна.

Аьгьвалат гъагъиб вуйивализ лигну, улихьна йигъари Дагъустан Республикайин Халкьдин Собраниейин гьаму йисандин сабпи сессия-йиъ депутатари му месэла гъитIибккну. Республикайиъ гьамусяаьт хъархъсарихъди ва зирзибилихъди айи читин аьгьвалат ахтармиш апIбан кьяляхъ, дурари, «Лидер» УК-йихьан региондин операторин вазифйир кьяляхъ тадагъну, думу вазифйир «Мягьячгъала-1» ва «Горсервис» МБУ-йирин хилиз тувбанди къарар адабгъну.

Къайд дапIну ккундуки, зирзибилихъди аьлакьалу читин месэла саб Мягьячгъала ва Каспийск шагьрариътIан адарди дар, му месэла республикайин саки вари муниципалитетариъ гъагъиди дийибгъна. Мисал вуди Табасаран район улупуз шулу. Му райондиан зирзибил дурубхрайивалин гьякьнаан аьрзйир гьаммишан газатдин редакйияйизра гъюра. Кьибла Дагъустандиъ зирзибил уч апIурайи «Экологи-Ка» компанияйи чаина гъадагънайи вазифйир лазим вуйи къайдайиинди тамам дарапIри, хайлин вахт ву. Гьаддиз думу компанияйизра му терефнаан ляхин апIуз къадагъа гъапIну.

Гьамус кадагънайи региондин операторар «Мягьячгъала-1» МБУ-йи рес-публикайин «Кьялан-1», «Кьялан-2» ва «Кафари-1», «Кафари-2» зонйириъ, хъа «Горсервис» МБУ-йи – «Кьибла» ва «Дагълу» зонйириъ уч дубхьнайи зирзибил адабгъбан ляхин апIуз хъюгъди. Амма гьелелиг дурар тасдикь дапIнадар.

Му ляхин ухдиси гьял дапIну, улупнайи компанйир тасдикь дапIну, ихь республика чиркишнарихьан марцц апIур кIури, умуд кивраза.