Аьдат вуйиганси, февралин вазлиъ Табасаран райондин гъулариъ агьалйирин собранйир гъягъюра. Думу собранйириъ гъуларин поселенйирин главйири чпи гъубшу йисан дапIнайи ляхникан, гьаму йисаз айи планарикан ктибтури шулу. 

 

 

Гъубшу йисан агьалйирин улихь удучIвну улхбан саягъ дигиш гъапIнийи, гьаддиз гьаму йисан дицисдар гюрюшар гьарсаб гъулаъ кIули гъягъиди. Райондин глава Мягьямед Къурбановди къайд гъапIганси, мициб къайда ерли самоуправлениейин органарин ляхникан ачухъ мялуматар гъадагъбан ва райондин гъуларин агьалйирихъди багахь аьлакьа уьбхбан бадали, тешкил дапIнайиб ву.

Улихьна йигъари Мягьямед Къур-банов Къужникарин гъулан поселение-йин Гъулли гъулан агьалйирин собраниейиъ иштирак гъахьну. Гъул аьхюб дар, душваъ яшамиш шулайидар вари 14 хизан ва 82 агьали ву. Собраниейиз уч духьнайидар сифте «Къужникарин гъулан совет» гъулан поселениейин глава Несредин Къурбановдин удучIвну улхбахъ хъпехънийи. Дугъу 2021-пи йисан гъулан поселение артмиш апIбан планарикан ктибтнийи.

Мягьямед Къурбановди табасаран район республикайин ва федералин мяна айи инфраструктурайин артмиш’валин жюрбежюр программйириъ иштирак шулайиваликан, мектебар, рякъяр рас апIбакан, гъулан мяишатдин ва туриствалин цирклар артмиш апIбан планарикан гъапнийи.

«Райондин гъулариъ гьамцдар соб-ранйир агьалйиринна ерли самоуправлениейин органарин арайиъ сюгьбат гъабхбан бадали лазим ву. Гьаму жюрейиинди гизаф месэлйир йишв’ин гьял апIуз ва варидарин разивал айи къарар адабгъуз шулу»,

– мялум гъапIну Мягьямед Къурбановди.

Гъийин йигъаз Табасаран райондин Хючнаарин, Халгъарин, Къужникарин, Гум’арин, Гурхъарин гъуларин поселенийириъ собранйир духна. Февралин ваз ктабхъайиз имбу гъуларин агьал-йирихъдира гюрюшар гъахиди.