Вахтназ вуди РД-йин Главайин вазифйир тамам апIурайи Сергей Меликовди, учв цIийи гъуллугънаъ дийигъу сабпи йигъарилан тина чан асас метлеб – республикайин агьалйирихьди сигъ аьлакьайи хьувал ва дурарин важиблу месэлйир гьял апIувал вуйиз кIури, мялум гъапIнийи.
Дугъриданра, думу кми-кмиди жямяаьтлугъдин жюрбежюр гъатарин вакиларихъди гюрюшмиш шула – журналистарихъ, дилаварчйирихъди, илмин цирклиъ лихурайидарихъди. Нубатнан серенжемдиъ C.Меликовди 17-пи февралиъ Мягьячгъалайиъ Дагъустандин жямяаьтлугъ тешкилатарин, интернет-шерикваларин вакиларихъди, блогерарихъди гаф-чIал гъапIну. Сюгьбат лап маракьлуб гъабхьнийи.
Вахтназ вуди РД-йин Главайин вазифйир тамам апIурайири гюрюшдин эвелиъ, думу (гюрюш) фици дубхну ккундуш, чан фикрар ачмиш гъапIнийи: «Узуз ихь гаф-чIал апIувал аьдати совещаниеси дубшну ккундарзуз. Узуз гъи жигьиларин арайиъ айи, социалин сетариз адагъурайи месэлйирикан ебхьуз ккундузуз».
Гюрюшдиъ наркотикар тарагъбаз аьксиди гъабхурайи женгнахъди аьлакьалу месэлара гъитIибккнийи. «Гъийин девриъ наркотикар Интернетдин кюмекниинди тарагъура. Гьаддиз ухьу профилактикайин ляхниз артухъси фикир тувну ккунду», – илтIикIнийи жигьиларихьна Сергей Меликов. Дугъу гьаму йисан эвелиъ Таркийиъ гъахьи дюшюшра кIваина гъабхнийи.
Жигьиларин суалариз жавабар туври, региондин кIулиъ айири гьацира электричествойихъди, штухъди, газдихъди тямин апIбан, дилаварчивалин, бикарвалин, ватанпервервалин, чпин хушниинди кюмек туврударин ляхнин эгьемиятлувалин ва гьацдар жара месэлйирра за гъапIнийи. «Йиз байвахтнаан узуз кIваинди имбуганси, Мягьячгъала цIийикIултIан саламатди инсанар лицру, чру ва уткан шагьур дубхьну ккунду. Ухьу, жямяаьтлугъ сатIи дапIну, саб терефназди лигури, сатIи вуйи ляхин апIурайивалин гъавриъ духьну ккунду», – гъапну Сергей Меликовди.
Серенжемдин натижйир йивури, вахтназ вуди РД-йин Главайин вазифйир тамам апIурайири уч духьнайидариз чухсагъул мялум гъапIну. Дугъан фикриинди, гюрюш мяналуб ва хайирлуб гъабхьну, амма гизаф суалар хъана тартиб апIувал лазим ву. Гьаддихъди сабси, Сергей Меликовди гъапиганси, жигьиларихъди вуйи нубатнан гюрюш хьайиз гъи гъитIиркку месэлйирин саб пай гьял дапIну ккунду.
