Советарин Союздин заманайиъ 23-пи февраль Советарин армияйин ва гьюлериин дяви гъабхру флотдин Йигъси къайд апIури шуйи. Вахтар гъушну, хъа машквар, цIиб жараси вушра, къайд апIури ими. Гьамус думу машквар Ватан уьбхрударин, вари яшарин жиларин машквриз илтIибкIна.
Дигиш’валариз дилигди, думу йигъ Урусатдин Федерацияйиъ дявдин гъуллугънаъ ади Ватан уьбхюрайидарин асас машквар вуди гъубзра. Думу машкврихъди ухьу сифтена-сифте Ватан бадали женг гъубхдар, кьувватнан гъурулушариъ лихурайидар, армияйиъ Ватандин улихь чпин буржи тамам апIурайидар, ихь уьлкейин Конституцияйин ихтиярар уьрхюри, ихь ва харижи уьлкйириъ ватанпервервалин буржи тамам гъапIдар тебрик апIури шулхьа. Хъа Ватан, дявдин пишейин гъуллугъчйириси, духтрарира, цIа ктIубшврударира, табиаьтдин хатIа-балйирихъди женг гъабхрударира уьбхюри шулу.
Салман Буржумов 1976-пи йисан Табасаран райондин ЖагътIил гъулаъ бабкан гъахьну. Курккарин кьялан мектеб ккудубкIбан кьяляхъ, 1994-1996-пи йисари дугъу Москвайиъ Яракьлу кувватарин жергйириъ чан ватандаш’валин буржи тамам гъапIну. Армияйиан гъафибси Мягьячгъалайиъ 1-пи ОМОН-диъ ляхниъ учвIну. Ляхниз аьдати эскерди дуфну, подполковникдин ччвур гъадабгъайиз, дугъу гъуллугънан фициб рякъ ккадапIнуш, учуз ктибтнийи.
«ОМОН-диъ ляхин апIури гъахьи садпи йисар варитIан читиндар вуйи. Чечен Республикайиъ дявдин женгар гъягъюрайи. Сад йисна гьацIаъ Новолак райондиъ Дагъустандин сяргьятар уьрхюри, гъуллугъ апIури гъахьунза. Дагъустандин Буйнакский райондин «Кьадар аьтрафдиъ» хусуси метлеб айи месэлйир тамам апIруган игитвал улупбаз лигну, Урусатдин Игитрин ччвур туву Загид Загидовдин хусуси метлеб айи рота яратмиш гъапIган, гьадму ротайиз гъафнийза, жаради вуйи хусуси метлеб айи баталь-ондиъ сад йисна йирхьуб вазлиъ гъуллугъ апIури гъахьунза. Кьадар гъулан аьтрафариъ гъуху женгариъ сифте йигъари учухъди гъуллугънаъ айи 4 эскер йивну гъийихнийи. Федералин кьушмарин тереф уьбхюри, чпин хушниинди учуз кюмек апIрудариканра гъийихдар шуйи. Вагьабитариз къанундин къайдайихъди рази хьуз гьичра ккундайи. Душваъ дурари чпин аьдатар тяйин дапIнайи. Гизаф гъагъи аьгьвалат вуйи. 1999-пи йисан 28-пи августдихъан тина 12-пи сентябризкьан Карамахийиъ ва Чабанмахийиъ гъагъи женгар гъахьнийи. Душваъ къанундин къайда дебккбан кьяляхъ, ич рота Каспийск шагьриъ ерлешмиш дубхьнайи ОМОН-диз илтIибкIнийи. Зиихъ гъапиганси, йисар читиндар вуйи, республикайиъ кIули гъуху хусуси метлеб айи дявдин гьяракатариъ гизаф ражари иштирак гъахьунза. 2002-2007-пи йисари МВД-йин Краснодар шагьриъ айи милицияйин мектебдиъ дурхну, думу ккудубкIунза.
Гьаму гъуллугънаъ варитIан гъагъиб фу ву дупну гьерхиш, жаваб тувраза: варитIан кIваз гъагъиб жвувахъди гъуллугънаъ айи кас яв уларихь йивну йикIувал ву. 2004-пи йисан Гелаевдин десте Дагъустандин ва Чечендин дагълариан тина Грузияйиз жиниди гъябгъюрайи. Дурар дисбан дявдин гьяракатнаъ иштирак гъахьунча. Гелаев ва дугъан десте йифу ккапIнайи гъарзун чIуликк жин духьнайи. Дурарихъди гюзчивал гъабхурайи ич дестейиан вуйи сар эскер 150-200 метр ягълишин али гъарзун чIулилан кучвурхну ахънийи. Думу йигъ кIваълан гъябгъюрдариз.
Хусуси метлеб айи гизаф операцйириъ иштирак хьувал алабхъунзуз. Табасаран райондиъ СиртIич гъулан багахь гъабхьи, Хив райондин Ляхла гъулан советдин хуларик цIа кипу вахтна гъуху операцйириъра иштирак гъахьунча»,
– ктибтну подполковник Салман Буржумовди.
Подполковникди гьамус республикайиъ айи аьгьвалат харжиб даруваликан, амма РД-йиъ айи Росгвардияйин Управлениейин эскрари мугъаятвал дубгури адруваликан мялум гъапIнийи.
Чан ихтилатнан аьхириъ Салман Буржумовди жигьил баярикан мектебдиъ ужуди урхувал, азад вахтна спортдиин машгъул хьувал, жямяаьтлугъдиз мянфяаьтлу ва инсанариз уж’вал кайи ляхнарихъ хьувал ккун гъапIнийи.
Салман Буржумовди гизаф йисари жавабдарвалиинди гъуллугъ гъабхбаз дилигну, дугъан ляхин командование-йин терефнаан гьюрматнан грамот-йириинди ва медалариинди лишанлу дапIна.
Салман Фейтуллаевич ужуб хизандин эйсира ву. Дугъу ва чан уьмрин юлдаш, филологияйин илмарин кандидат Седефханумди кьюр бай ва сар риш тербияламиш апIура. Аьхюну бали Санкт-Петербургдиъ дявдинна космосдин Академияйиъ урхура.
Султан Буржумовдиз ва дугъан хизандиз мюгькам сагъ’вал, бахтлу ва саламат уьмур ккун апIурача. Гъит ихь уьмриъ гьамцдар дирбаш баяр артухъ ишри.
