Милли чIалар уьрхбан Йигъан гъаншариъ РД-йин Миннацди, Дагъустандин 100 йисандин юбилей къайд апIбан дахилнаъди, милли чIалнан ва медениятдин гьякьнаан аьгъювалар ахтармиш апIбан бадали, тялукь викторина мялум гъапIнийи.

 

Му викторинайиъ, табасаран чIалнаан заан аьгъювалар улупбаз лигну, Манаф Шамхаловдин ччвурнахъ хъайи Хиварин уьмуми аьгъювалар тувру мектебдин бабан чIалнаан дарсар кивру мялим Гюлизар Бегова (шиклиъ министр Э.Муслимовдихъди) гъалибвалин сабпи йишваз лайикь гъахьну.

– Узуз йиз багъри чIал гьарсаб вахтна багьа ва маракьлу вузуз. Хъа мектебдиъ бабан чIалнаан дарсар киврайивализ лигну, чIалнан девлетлувал ашкар апIбан зиин зегьмет зигури, жвувахьна лап тIалаблуди янашмиш хьувал алабхъуразуз. Дугъриданра, ихь бабан чIал девлетлуб ва кьадарсуз гюрчегуб ву. Жигьилар дидхьан ярхла шулайивали узу пашманра апIура.

Республикайин милли политикайин ва диндин ляхнариз лигру министерствойи милли чIалариан викторина гъабхурайиваликан мялум гъабхьиган, узу аьхю аьшкьниинди дидиъ иштиракра гъахьунза. Гъийин девриъ республикайин дережайиъди тялукь серенжемар гъахувалиъ милли чIалар уьрхбан жигьатнаан аьхю мяна а. Аферин гьарсариз! – гъапну ич сюгьбатнаъ Гюлизар Беговайи.

Аьлава апIураза, Гюлизар Гьяжимурадовна 1994-пи йислан мина Хиварин мектебдиъ мялимди лихура. Думу чав ва дугъу илим туврайи баяр-шубар, саки гьар йисан райондин ва республикайин дережайиъди гъахурайи саб жерге конкурсариъ, олимпиадйириъ иштирак шули, гъалибвалин йишвариз лайикь шула. Ляхниъ заан хъуркьувалар улупбаз лигну, Гюлизар Бегова «Урусатдин образованиейин гьюрматлу гъуллугъчи» ччвур тувбиинди лишанлу дапIна.

Улубкьурайи дишагьлийирин машкврихъди тебрик апIури, мялимдиз артмиш шулайи наслариз илим тувбан баркаллу рякъюъ мюгькам сагъ’вал ва хъанара заан хъуркьувалар ккун апIурхьа.