Дагъустан Республикайин образованиейинна илимдин министерствойи, ДАССР-ин 100 йис хьпаз бахш вуди, багъри юрднакан айи аьгъювалар ахтармиш апIбан олимпиада тешкил гъапIну. Шубуб этапдиъди кIули гъубшу олимпиадайин аьхиримжи, республикайин, этап заочно жюрейиинди февралин 24-диан 26-пи йигъазкьан давам гъабхьну. Ккудубшу гьяфтайиъ олимпиадайин натижйирра гъивну.

 

Муниципалин этапдиъ гъалиб гъахьи Табасаран райондин Кюргъярин кьялан мектебди 9-пи классдиъ урхурайи Мадина Керимова (шиклиъ) республикайин этапдиъра «Йиз ватанагьлийир – советарин гьюкум бадали женг гъубхдар» номинацияйиъ иштирак гъахьну.

Мадинайи, тялукь ахтармишар духну, ДАССР артмиш шулайи вахтари гьахьи асас гьядисйирикан ктибтури, шикларра хъади гьязур дапIнайи проект олимпиадайиз хътапIну. Дугъаз олимпиадайиъ иштирак хьуз кюмек гъапIур чпин мектебдиъ тарихнан дарсар киврайи мялим Марина Аьбдуллаева вуйи.

Натижйир йивруган, олимпиадайин жюрийи, Мадинайин ляхниз 20 балл дивну ва дугъаз 2-пи дережайин диплом тувну. Сарпир хьпан бадали, ихь шураз анжагъ саб балл гьубкIундар.

Чан бицIи ватандикан ужудар аьгъювалар айи Мадинайихъди гаф-чIал гъапIнийча.

«Олимпиадайиз гьязур гъапIу проектдиъ узу ич гъул’ан вуйи Аьбдулкерим Муфтаховдикан ва Жигьан Рамазановайикан ктибтунза. Жигьан бабу хайлин кюмекра гъапIниз – проектдиъ ишлетмиш гъапIу думу вахтарин шиклар, дявдин вахтарикан хайлин мялуматар тувунзуз, фицики дугъан адаш Ватандин Аьхю дявдиъ иштирак гъахьир ву. Жигьан бабу узуз чаканра ктибтнийи. Думу китабханайиъ лихуз хъюгъю сарпи табасаран дишагьли ву. Чав китабханайиъ лихурайи вахтари Жигьан бабу, жямяаьтдихъди гюрюшар гъахури, совет гьюкуматдин тереф уьбхяй кIури, гаф-чал апIури гъахьну. Дишагьлийи гьаму жюрейин гюрюшар гъахура кIури, дугъкан наразивал улупурайи агьалйирра фукьан вушра ади гъахьну»,

– гъапнийи Мадина Керимовайи.

Мадинайизна дугъан мялим Марина Аьбдуллаевайиз олимпиадайиъ иштирак хьуз саки вари гъуландари кюмек гъапIну. Гьадрарин арайиъ Шекер Аьбдуллаева ва Залха Къурбанялиевара а.

«Узуна йиз мялимди ич гъулан гьарсаб хизандин тарихар ахтармиш гъапIунча. Рягьматлу Къурбан Аьгьмедовди учв кечмиш хьайиз уч апIури гъахьи, гъулан тарихдикан вуйи ва думу чIивиди имиди дугъан гафарилан йиз дада Айханум Рашидовайи уч гъапIу мялуматарира кюмек гъапIунчуз. Варидиз чухсагъул мялум апIураза.
Табасаран райондин образованиейин управлениейин начальникдин заместитель Ольга Красноженовайиз, йиз ляхниз ужуб кьимат дивну, думу олимпиадайин республикайин этапдиз гьапIбаз жаради чухсагъул пуз ккундузуз»,

– аьлава гъапIнийи Мадина Керимовайи.