Улихьна йигъари узу Акъа гъулан кьялан мектебдин 2-пи классдиъ урхурайи, Дагъни гъул’ан вуйи Гьямид Аьбдурягьмановдин аба Маллаисин Аьбдурягьмановдин теклифниинди, дурарин хулаз гъушнийза. Мина Гьямиддин классдин идара апIурайи мялим Аьбдуллагь Гьясанбеговдизра дих дапIнайи.

 

Узу сабпи нубатнаъ хизандин аьгьвалатнахъди таниш гъахьунза. Гъилигу гьялариан, хулаъ айидар наанкIа лихурайидар дар, нежбервалин хизан ву. Абайи арфар уьрхюра.

Маллаисин Аьбдурягьмановди учуз теклиф апIбан себеб – чан худул Гьямиддин гьам урхувалихъ, гьамсан спортдихъ аьхю тямягь хъайиваликан хабар тувувал вуйи. Дугъу Аьбдуллагь Гьясанбеговдикан ва чан худлин абйир-бабариканра Гьямиддин бажаранвалар ачмиш апIбиин сатIиди зегьмет зигувал ккун гъапIнийи. «Гьямиддикан гъюзимбу уьмриъ ухьу, вариди кюмек тувну, чемпион дапIну ккунду», – гъапнийи абайи.

Акъа гъулан улихь хьайи аьхю гъядухъ Аьбдурягьмановари цIийи хуларра тикмиш дапIна. Спортдиин машгъул хьуз хулаъ аьхю залра а. Чан терефнаан Маллаисин Аьбдурягьмановди бажаранлу худлиз, спортдин лазим вуйи вари алатар, шей’ар масу гъадагъурза кIури, гафра тувну.

Узу Гьямиддихъдира саб бицIи сюгьбат гъубхнийза. Дугъу узуз, аьгъювалар гъадагъбаканра, спортдиканра аьхю мянфяаьт ктабгъуз чан юкIв хъайиваликан ктибтнийи. Дугъан дневникдик кайидар анжагъ юкьбарна хьубар вуйи.

Узу ва Аьбдуллагь Гьясанбеговди гьисаб апIури, бали, хилариин ис-за шули, 120 ражну жилик шаф кубкIнийи, гьацира турникдикк хайлин уйинар гъапIнийи.

«Мектебдиъ Гьямидди учв вари терефарихъанди лап зигьимлу байси улупура. Дугъу компьютерихъдира, ноутбукдихъдира ужуди ляхин апIуз гъудубгъну. Дугъаз чан класс-диъ айи баяр-шубаринра, мялимаринра терефнаан гизаф гьюрмат а», – къайд гъапIнийи Аьбдуллагь Гьясанбеговди.

Аьбдурягьмановарин хизандиъ сарсана зигьимлу велед аьхю шула – риш Аида. Дугъура сабпи классдиъ заан кьиматариз урхура. Эгер бицIирик гьунар каш, думу ухди-кьанди ашкар хьибди, кIури шулу. Хилариинди ва ликариинди илтIикури, Аидайи хулаъ айи залилан саб-швнуб чарх гъивнийи, акробатикайин жюрбежюр уйинар гъапIнийи. Шуран художествойин гимнастикайихъ гизаф юкIв хъа.

Акробатикайиин машгъул хьуз варитIан ужуб вахт 5-7 йисарин яшнаъ айиган ву, гьаддиз давди вахт гьапIну ккундар. Чемпионар гьамци бицIидимидитIан зегьмет гъизигиган шулайидар ву. Гьямидди ва Аидайи гележегдиъ чпи гъадагъру аьхю хъуркьувалариинди ухьу рази апIиди кIури, умуд кивуз ккундузуз. Дурариз жандин сагъ’вал, чпин ккебгърайи спортдин уьмриъ хъуркьувалар ишри.

БицIидариз ачухъ рякъ тувбаз дурарин абйир-бабариз – Бахтияр ва Наида Аьбдурягьмановариз, худлариз вари терефарихъанди кюмек туврайи Маллаисин абайизра аьхю чухсагъул.

 

Шиклиъ: гагвлахъан арчлахъинди – Наида, Гьямид Аьбдурягьмановар, Аьбдуллагь Гьясанбегов, аба Маллаисин, Маида ва Аида Аьбдурягьмановар.