КIару беълийиз ухшар айи успагьи улар, мани инчIраккди гьисс шулайи гъюдли, амма ихтибарлу сес, гюрчег машнан кIалбар, мяълийир апIбан ва актервалин устадвал…
Узу табасаран мяълийирин устад, Гьюкуматдин табасаран драмтеатрин артистшив Фаина Аьбдуллаевайикан улхураза. Дугъан хасиятнан хайлин ужудар лишнар ктухуз шулу. Хъа жараси хьубра мумкин дар, фицики Гьюкуматдин табасаран драмтеатриъ РД-йин лайикьлу артистарихъди, бажаранлу актерарихъди саб сягьнайиин лихурайи дугъу гьар йигъан ужуб чешне ва тажруба гъадагъура.
Фаина Аьбдуллаева Дербент шагьриъ бабкан гъахьну. Дугъан бин Хив райондин Мажвгул гъул’ан ву.
Фаинайиз мяълийир апIуз бицIи вахтнахъан мина аьшкь айи, ва Дербент шагьрин 15-пи нумрайин мектебдиъ урхура-йиган, жюрбежюр конкурсариъ иштирак шули, дугъу заан хъуркьувалар улупу дюшюшарра гъахьну. Шуран кIваъ, музыкайин училищейик урхуз кучIвну, гележегдиъ мяълийир апIбан рякъ давам апIуз ният айи. Амма сифте мяълийир апIбахьна дугъан адаш наразивалиинди лигури гъахьнийи. Аьхирки шуран кIван хиялари адаш гъюдли гъапIнийи, ва 2003-пи йисхъан мина Фаинайи жюрбежюр табасаран серенжемариъ, машкврин концертдин прог-раммйириъ ва сумчрариъ мяълийир апIура. Мидланра гъайри, Гьюкуматдин табасаран драмтеатриъ лихури, Фаина Аьбдуллаевайин 5 йис шула.
Сифте, цIиб улихьна йисари, театриъ бицIи вахтна дилихну, думу театр дипуз мажбур гъахьнийи. Театриан удучIвбан кьяляхъ, дугъаз саб фу-вуш чаз лап кьимат адруб, багьалуб гъудубгиганси, саб фу-вуш гьудрубкIрайиганси айи. Табасаран театриз цIийи директор гъафиган, театрин ляхин бинайиан дигиш апIуз хъюгънийи. Гьадму вахтна Фаина Аьбдуллаевайизра багъри театри раккнар ачмиш гъапIну. Дугъаз чав уйнамиш гъапIу вари ролар кIваинди ими.
«Узу сабпи ражари театриз дуфнайи йисари бицIидариз швеъдикан ва Машенькайикан вуйи сягьна дивнийча. Думуган режиссер Аьлисултан Батыров вуйи. Узу Машенькайин роль уйнамиш апIури гъахьунза. Учу думу спектакль хьади Табасаран ва Хив районарин хайлин гъулариз гъушунча. БицIидарин разивал ва шаду аьлхъбар гъира уларихь хьамийиз. Дурари узу, дугъриданра, Машенька ву кIури, гьисаб апIури гъахьну. Узу думуган бицIир, уьру гарцIлар кайир ва Машенькайихъна гъушурра вуйза. Кьюбпи ражари театриъ лихуз хъюгъиганра, узу бицIидариз урус чIалниинди вуйи «Гъизилин шюхъ» спектаклиъ гъизил даттлин роль уйнамиш гъапIнийза. Му махъв сягьнайиин режиссер Жамбулат Гьябибовди дивнийи. Думу сягьнайиъра йиз роль лап кьабулди вузуз. Шаду бицIидар, рази абйир-бабар рякъруган, сягьнайиин ролра уйнамиш апIуз аьхю аьшкь ва гьевес шулу»,
– кIура Фаина Аьбдуллаевайи.
Фаина Аьбдуллаевайи Табасаран драмтеатри аьхиримжи вахтна сягьнайиина адабгъу «Миржир дишагьли» спектаклиъ хизандиъ варитIан бицIину шуран роль уйнамиш гъапIну. Жарадарси дарди, думу роль дугъаз сацIиб гъагъиб гъабхьну. Гъагъиб гъапиган, думу спектаклра философияйин гизаф дерин мяна айиб, жямяаьтлугъдинна яшайишдин гъагъи месэлйириз бахш дапIнайиб вуйи. Хизандиъ сар эйси ва дугъаз ккуни 8 дишагьли яшамиш шула. ВаритIан бицIину шураз варибдикан хабар а, ва чпин адаш думу дишагьлийириз саризра даккниб, амма, дугъан пулиъ ул абхъну, думу алдатмиш апIурайиб аьгъя. Шуру адашдиз вари ашкар апIуру, хъа аьхириъ багахьлуйирин инкарвал аьгь апIуз дархьиди, адашди учв йивну йикIуру. БицIину шуру адаш кечмиш хьувалиъ учв тахсиркарси гьисс апIуру. Гьаддиз Фаинайиз му роль гъагъидарикан саб гъабхьну.
«Режиссери узухьна фунуб роль тувишра, думу аьхю аьшкьниинди кьабул ва уйнамиш апIурза. Узуз репетицйир гизаф кьабулди шулзуз. Актервалин ляхнин сабпи йисари, иллагьки гьадму репетиц-йириъ гъвалахъ хъайи бажаранлу ва заан устадвал улупурайи ихь актерарихъан ужудар дарсар гъадагъунза. Режиссер Жамбулат Гьябибовди ва директор Аьлимурад Аьлимурадовди ихь театр улихь гъябгъюз хайлин зегьмет зигура. Аьхиримжи йисарин театрин хъуркьувалар дурарин баркаллу зегьметнан натижа ву. Узу гьамушваъ лихурайивалиинди дамагъ апIураза. Йиз коллектив ккундузуз. Ич коллективдин вари вакилар ужудар, сар-сарин гъавриъ айидар, тазади ляхниз гъафидариз чпихьан шлу кюмек апIрудар ва насигьят туврудар ву.
Узуз «Табасарандин нурар» газатдин машариан тина ихь театриъ ва культурайин цирклин идарйириъ лихурайи вакилар улубкьурайи Урусатдин культурайин гъуллугъчийин Йигъахъди (25-пи март) теб-рик апIураза. Му йигъ ихь уьлкейиъ чпин ляхин дериндиан аьгъю культурайинна искусствойин, кинематографияйин, СМИ-йин, туризмдин ва жара циркларин пишекрари къайд апIуру. Му цирклариъ вари уьлкейин жюрбежюр йишвариъ баркаллуди зегьмет зигурайи табасаран вакиларра хайлин а. Гъит дурарин гьарсарин хизандиъ шадвал, уж’вал, девлет, берекет ибшри. КIваъ айи мурад – метлебар варидарин тамам ишри!»,
– гъапну Фаина Аьбдуллаевайи.
Ав, Фаина Аьбдуллаева гьякь ву. Культурайин гъуллугъчйир ихь уьмриз искусство, яратмишар, бажаранвал, мукьмар, шадвал хурайи инсанар ву. Гъит дурарин кIван гьевес гьарган шадди гъубзри, лихуз кьувват ва, икибаштIан, маважиб артухъ ибшри!
