Ухьуз мялум вуйиганси, 25-пи март вари уьлкейиъ культурайин гъуллугъчийин Йигъси мялум дапIна. Аьхиримжи вахтари, ихь уьлкейиъси, республикайиъра культурайин гъуллугъчийин Йигъаз тялукь вуйи хайлин серенжемар кIули гъахура. Табасаран райондиъра му йигъ кIваълан гьапIнадар.
Гъи пишекарвалин йигъан гъаншариъ Табасаран райондин культурайин цирклиъ гъазанмиш дапIнайи хъуркьуваларикан ктибтуз ккундузуз. 2021-пи йисан 1-пи январихъан мина Табасаран райондиъ культурайин управление тешкил дапIна, дидин начальникди Аьбдулвагьаб Аьбдулов дерккна, заместителди – Эстенгер Халилов. Управлениейиъ кьюб отдел ачмиш дапIна – культурайин (начальник Арсен Асланов) ва спортдинна туризмдин отдел (начальник Низам Агъаризаев). Гьамцдар дигиш’валар гъапIхъан мина райондиъ культурайин ляхин саб хайлин улихь гъябгъюз хъюбгъну. Гизаф серенжемарра кIули духна: гьадму гьисабнаан ЦIийи йис, 23-пи февраль, 8-пи мартдин машкврариз бахш вуйидар. Цци Табасаран райондиъ Эбелцнан машквар къайд гъапIундаршра, райондин культурайин цирклиъ лихурайи гъуллугъчйири, Эбелцнан саб ужуб аьдат гьязур дапIну, 19-пи мартдиъ Мягьячгъала шагьриъ Урус театрин улихь думу улупну. 22-пи мартдиъ гьадму аьдатнахъди аьлакьалу сягьна Дербентдиъ Лезги театриъра улупну (шиклиъ). Гьамусяаьт Мурадхан Амирхановди гъибикIу «Ичкичи ва туканчи» кIуру цIийи спектакль гьязур апIуз хъюгъна. Саб жикъи вахтнан арайиъ думура сягьнайиин дивну, кIулиз адабгъиди. Апрелин вазлиъ Шамил Къазиевдин яратмиш апIбариз тялукь вуйи серенжемра яркьуди къайд апIбанди ву.
Гьамусяаьт Табасаран райондиъ культурайин 14 центрар лихура. ТIюрягъ, Къужник, Кюрягъ, Жвулли, Гуми, ЦIурутIил, Хючна культурайин хулариъ лихурайи варитIан ужударсдар пишекрарикан ибарат вуйи фольклорин сатIиди вуйи саб коллективра яратмиш дапIна.
Аьхиримжи вахтна культурайикан гизаф улхура, культурайин пишекрарихьна вуйи тIалабар артухъ дапIна, амма му ляхин дурариз айи материалинна техникайин бинайихъди ттабхьну гъюрадар. Культурайин аьгъювалар тарагъбаан фициб ляхин гъабхиди, эгер, ляхин апIбан бадали, саб жюрейинра шартIар адарш?! Мисалназ, клубдин дарамат аварийный гьялнаъ ади, тялукь аппаратура, сягьнайиин алабхьру палат адарди (айибра лап йирсиб ву), гъадабгъурайи маважибра лап цIиб вуди, музыкайин алатар адарди гъахьиш, гьациб йишваъ культурайин фициб ляхин арайиз гъюру? Гьаддихъди суал арайиз гъюру – гьацдар культурайин ужагъар гележегдиъра уьрхбан мяна айин? Культурайиъ дибдиан вуйи дигиш’валар духьну ккунду. Культурайин пишекрарин маважиб за, дурар лазим вуйи техникайихъди, милли палатдихъди, музыкайин алатарихъди тямин дапIну ккунду.
2021-пи йисан Табасаран райондин главайи тялукь вуйи аппаратура, сягьнайин палат ва жара авадлугъар масу гъадагъуз лазим вуйи кьадар дакьатар жара гъапIну. Райондин культурайин цирклиъ лихурайидар, чпин ляхниз мициб фикир тувувалиин, гьелбетда, гизаф рази ву, фицики фунуб ляхинра ужудар шартIариканра асиллу шула.
Культурайин цирклиъ лихурайи вари гъуллугъчйир пишекарвалин йигъахъди тебрик апIури, Аьбдулвагьаб Аьбдуловди туву мялуматариз асас вуди, Табасаран райондин культурайин ужагъариъ ужуб ляхниинди тафавутлу шулайи пишекрарра къайд апIураза. Магьа дурарин ччвурар: Сураят Гьяжикеримова, Муслимат Гьяжикъаибова ва Шаир Сяидов – ТIюрягъ гъулан культурайин Хал, Гьясрат Аьлимурадов, Мягьямед Аьлиев, Мягьямед ТIейибов – Къужник гъулан культурайин Хулан пишекрар, Аьбдукерим Керимов – Кюрягъ гъулан культурайин Хал, Адиширин Аьлиханов – Жвулли гъулан культурайин Хал, Арсен Гьяжикеримов – Гуми гъулан культурайин Хал, Исабег Наврузов – ЦIурутIил гъулан культурайин Хал, Рейгьанат Ханмирзаева ва Миная Гьяжиева – НичIрас гъулан культурайин Хал, Закарья Амирбегов, Рустам Рамазанов, ТIейиб Рамазанов, Бар’ят Исмяилова, Беневша Халилова – райондин культурайин Хал.
