«Сагъ’вал гъабхьиш, вари дюз шулу» кIуру гафар ихь арайиъ лап ухдитIан мина айидар ву. Дугъриданра, сагъ’вал айивали ясана адрували инсандин гьар йигъандин уьмур, дугъан жямяаьтлугъ ара ачухъди улупуру. Гьякьикьатдиъ сагъламвал – му инсандин варитIан аьхю девлет ву. Гьаддиз гьарсар кас чан вари уьмриъ думу уьбхюз чалишмиш духьну ккунду. Хъа эгер иццру гъахьиш, ухьуз кюмекназ гъюрайидар, сагъламвал уьбхбан гъаравлиъ айидар медицинайин гъуллугъчйир ву.
Табасаран райондин ТIюрягъ гъулаъра агьалйирин сагъламвалин гъуллугънаъ духтирвалин амбулатория ади гизаф йисар ву. Амбулаторияйиъ узуз гъапиганси, душваъ лазим вуйи медикаментарихъди ва жара алатарихъди тямин апIбаан читинвалар гьисс апIурадар. Анжагъ, къайд апIуз ккундузузки, гъул райцентрихьан ярхлаъ ерлешмиш дубхьнайивализ лигну, амбулаторияйиз тялукь транспортра ади ккундийи. Гьамусяаьт айи «Нива-21214» маркайин автомобиль гизаф йисари дилибхнайиб ву ва медицинайин тяди кюмек лазим гъабхьи вахтари ишлетмиш апIуз дурумлуб дар.
ТIюрягъ гъулан духтирвалин амбулаторияйин кIулиъ айир РФ-дин медицинайин гьюрматлу гъуллугъчи Саргиз Гьяжиризаева ву. Му амбулаторияйиъ лихури, дугъан къанна шубуд йис ву дубхьна. Амбулаторияйиз, хьуб кабинетра ккади, чан хусуси дараматар а. Душваъ фельдшер, кьюр акушер дишагьлийир, кьюр медсестра, силбарин духтир, юкьур санитар дишагьлийир ва водитель лихура. ЦРБ-йиан духтирвалин му амбулаторияйик китIнайи участокдин терапевтра улупнайи графикдиинди гъюри шулу. Амбулаторияйиъ лихурайи вари гъуллугъчйириз тялукь образование ва сертификатар а.
Гьар йисан 7-пи апрелиъ вари дюн’яйин сагъламвал уьбхбан Йигъ къайд апIура. Дидин метлеб – уьмрин сагъу къайда хъапIбан терефкрар артухъ апIувал, дюн’яйин уьлкйириъ медицинайин месэлйириз артухъди фикир тувуз гъитувал ва агьалйирин сагъламвал уьбхювал ву. Чпин аьтрафдиъ агьалйирин сагъвал уьбхбаан ТIюрягъ гъулан духтирвалин амбулаторияйира тялукь ляхин гъабхура.
Шиклиъ: ТIюрягъ гъулан духтирвалин амбулаторияйин медсестра Зияфет Гьаруновайи гъулан агьали Гьяжисефер Гьяжимягьямедовдин давление ахтармиш апIури.
