Гьаму йигъари Каспийск шагьриъ ерлешмиш дубхьнайи ОМОН-дин базайиъ Росгвардияйин 5 йис хьпаз ва къанун уьбхюрайи гъуллугънан 210 йис хьпаз бахш дапIнайи яркьу серенжем кIулиъ гъубшу.
Серенжемдиъ Росгвардияйин Кафари Кавказдин округдин командующийин заместитель, генерал-майор Игит Менафов, РД-йин МВД-йин министр Аьбдурашид Мягьямедов, Урусатдин Игит, РД-йин Росгвардияйин управлениейин кIулиъ айи полицияйин генерал-майор Мягьямед Баачилов, РД-йин Халкьдин Собраниейин председателин заместитель Камил Давдиев, Каспийск шагьрин мэр Борис Гонцов ва хъана жара касар иштирак гъахьнийи.
Росгвардияйин 5 йис хьпахъди аьалакьалу серенжемар, узу зиихъ къайд гъапIганси, Каспийскдиъ айи ОМОН-дин базайиан ккергъну. Милли гвардияйин гъуллугъчйир му йигъахъди тебрик апIури, улхуз удучIву Мягьямед Баачиловди мялум гъапIганси, ихь республикайин аьтрафариин али Росгвардияйин управлениейи ккудушу йисарин арайиъ Урусатдин Федерацияйин милли гвардияйин эскрарин улихь диврайи хайлин вазифйир, тамам дапIна ва гележегдиъра Конституцияйин къайдйир ва гьацира вари Урусатдин Федерация уьрхбан вазифйир заан хъуркьувалариинди тамам апIиди.
«Гъи гьаму ихь машквран йигъан узуз, учву гьарур жа-жаради му йигъахъди тебрик апIури, жвуван жан фидакар дапIну ляхин тамам апIуз гьязур вуйивализ, учвуз варидариз чухсагъул мялум апIуз ккундузуз. Гележегдиъра учву ихь гьюкуматдин къанунар ва хатIасузвал уьрхру умудлу даягъ хьиди кIури, хъугъраза. Учв тамам апIурайи гъуллугънаъ учвуз гьаруриз хъанара артухъ хъуркьувалар ишри, ярхи ва сагъу уьмур тувричвуз. Варидариз чухсагъул»,
– гъапну Мягьямед Баачиловди.
Серенжемдиз дуфнайи хялари гьарури Росгвардияйин гъуллугъчйир, му гъуллугъ яратмиш гъапIхъан мина мурарин 5 йис хьпан машкврихъди тебрик гъапIнийи. Хайлин гъуллугъчйир медалар, грамотйир тувбиинди лишанлу апIбан кьяляхъ, дуфнайи гьюрматлу хялари жюрбежюр женгариъ йивну гъийиху Росгвардияйин гъуллугъчйириз дивнайи гюмбетдихъ кюкюйир дивну, дурар кIваин апIури, саб дакьикьайиъ ккебехъну дийигънийи.
Серенжемдин асас пай аьхирихъна гъюбан кьяляхъ, ОМОН-дин эскрари уч духьнайидариз чпи гьязур дапIнайи дявдин программара улупнийи ва дина дуфнайидар вари солдтарин кухняйихъдина хурагарихъди ва гьацира дурари ишлетмиш апIурайи яракьарихъди таниш гъапIнийи.
Урусатдин милли гвардияйин 5 йис хьпаз бахш дапIнайи машквран серенжемар Мягьячгъалайиъ айи Урус драмтеатрин аьхюну залиъ яркьу концертдин программа улупбиинди аьхирихъна гъафнийи.
