Табасаран райондин 3-пи нумрайин ДЮСШ-дин волейбол уйнамиш апIурайидарин хъуркьуваларикан газатдин машариъ кми-кмиди макьалйир дикIувал алабхъурачуз. Думу ляхниин, шаксузди, учу анжагъ рази вуча.

 

Магьа улихьна йигъари райондиз сабсана шадвалин хабар гъафну: 2005-2006-пи йисан бабкан гъахьи живанарин волейболин команда Чечен Республикайин меркез Грозныйдиъ волейбол уйнамиш апIбаан кIули гъубшу сабпи йишв бадали вуйи ачухъ талитариъ гъалиб гъабхьну. Думу талитариъ варитIан ужурсир волейбол уйнамиш апIрурра Табасаран райондин волейболин командайин вакил ТIагьир Мягьямедов гьисаб гъапIну.

– Талитариъ иштирак’вал апIуз 8 команда гъафнийи. Табасаран райондин волейболин командайи 5 гюрюш кIули гъухну ва дурариъ варидариъ гъалибвал гъадабгъну. Ихь живанари аьхю устадвал улупнийи,

– къайд гъапIнийи ич гюрюшдиъ 3-пи нумрайин ДЮСШ-йин директор Ярягьмед Шамхаловди.

Мялум вуйиси, думу талитариъ кьюбпи йишв Къизилюрт шагьрин, шубубпи йишв Ачхой-Мартандин командйири гъадагъну.

Къайд апIуз ккундузузки, райондин 3-пи нумрайин ДЮСШ-ди йислан-йисаз заан хъуркьувалар гъазанмиш апIура. Дици вуйивалин гьякьнаан, 3-пи нумрайин ДЮСШ-дин директор Ярягьмед Шамхаловдиз РД-йин физический культурайин ва спортдин Министерствойин терефнаан вуйи Гьюрматнан грамота туври (шиклиъ), райондин глава Мягьямед Къурбановдира мялум гъапIну.