Гьаму шиклиъ учвуз рякъюрайидар Табасаран райондин ЦIийи-Лижва гъулан кьялан мектебдиъ урхурайи Амина Гьяжимягьямедова (шиклиъ гагв-лахъан арчлахъинди) ва Наргиз Даидова ву. Му шубари чпиз киврайи вари предметариан заан аьгъювалар гъадагъура. Дици вуйиваликан магьа ццийин урхбан йисандин шубубпи четвертдин натижйирира шагьидвал апIура: кьиматар саки вари «хьубар» ву.
ДумутIанра савайи, Амина Гьяжимягьямедовайи ва Наргиз Даидовайи аьгъюваларихьна вуйи чпин гьяракат райондин мектебариъ урхурайидарин арайиъ жюрбежюр предметариан кIули гъягъюрайи олимпиадйириъ иштирак шулайивалиинди ва пешкешнан йишвар гъазанмиш апIурайивалииндира тасдикь апIура. 9-пи классдиъ урхурайи Аминайи, месела, урус чIалнаан вуйи олимпиадайиъ 2-пи йишв гъазанмиш гъапIну. Дугъан юкIв али предметар асас вуди урус чIал, биология, химия, алгебра ва жарадар ву. УрчIвубпи класс ккудубкIиган, дугъаз урхувал чан багъри мектебдиъ давам апIуз ккунди а.
Наргиз Даидовайи 11-пи классдиъ урхура. Думу ццийин урхбан йисан райондин мектебариъ урхурайидарин арайиъ вуйи шубуб олимпиадайиъ иштирак гъахьну ва варидариъ пешкешнан йишвар гъазанмиш гъапIну. Наргизди гьамус чан вари кьувватар Гьюкуматдин саб вуйи имтигьнариз гьязур хьпаз сарф апIура. Хъа мектеб ккудубкIбан кьяляхъ, дугъу урхувал вуздиъ давам апIуз кьаст дапIна.
Мектебдин директорин урхбанна тербияйин ляхнариз лигру заместитель Ильяс Аьшурбеговди ич сюгьбатнаъ къайд гъапIганси, заан классариъ урхурайи Амина Гьяжимягьямедова ва Наргиз Даидова, аьгъювалар гъадагъбаанси, мектебдин жямяаьтлугъ ляхнариъ иштирак хьувалианра гизаф урхурайидариз нумуна ву.
