Мягьячгъала ва Каспийск шагьрариъ яшамиш шулайи гьюрматлу ватанагьлийир!
Коронавирусдин тIягъюн мялум апIбан кьяляхъ сабпи ражари Гьюкуматдин табасаран драмтеатрин коллективди чан ляхнин натижа – цIийи спектакль – тамашичйириз аьдати саягънииинди – залиъ сягьнайиин улупиди.
8-пи апрелиъ Мягьячгъала шагьриъ Къумугъ театрин дараматдиъ Аьбдурягьим Аьбдурягьмановди табасаран чIалназ таржума гъапIу француз драматург Робер Томайин «Миржир дишагьли» спектакль улупиди. Дидин сюжет гьякьикьи детективдин сюжетсиб ву. ГвачIнин ухди хизандин эйси чан ахникк дукIну гъидихъну. Фуж вуйкIан думу гъакIир? Хулаъ айидар вари чан ккуни хизанар ву: хпир, сижар баб, хпирин чи, чан шубар, чан чи, – саб гафниинди, миржир дишагьли. Шли думу йивну гъакIнуш, аьгъю апIуз ккундуш, ихь театрин цIийи спектаклиз лигуз гъачай.
Спектакль хябяхъган сяаьт ургубдин гьацIаъ (18:30) ккебгъди.
Билетар Къумугъ театрин кассайиъ масу тувра.Билетарин кьиматарин гьякьнаан ва жара мялуматар, телефондин 89285415100 нумрайиз зенг дапIну, гъадагъуз шулу.
