Гъябгъюрайи йисан февралин вазлиъ Табасаран райондин глава Мягьямед Къурбановди культурайин цирклин месэлйириан чан насигьятчиди Гьюкуматдин табасаран драмтеатрин директор Аьлимурад Аьлимурадов тяйин гъапIнийи. Думу, хилар хъиржвну, дишлади ляхнихъ хъюгъну.
Табасаран райондиъ тазади культурайин отделин начальникди дерккнайи Арсен Аслановдихъди сатIиди дурари райондин клубар ахтармиш апIура. Узу Аьлимурад Асланбеговичдихъди сюгьбат гъабхру вахтна, думу, СиртIич, Гюгьрягъ ва ЧвулатI гъуларин клубарин ужагъар ахтармиш дапIну, хулаз дуфну имийи.Табасаран райондиъ тазади культурайин отделин начальникди дерккнайи Арсен Аслановдихъди сатIиди дурари райондин клубар ахтармиш апIура. Узу Аьлимурад Асланбеговичдихъди сюгьбат гъабхру вахтна, думу, СиртIич, Гюгьрягъ ва ЧвулатI гъуларин клубарин ужагъар ахтармиш дапIну, хулаз дуфну имийи.
Аьлимурад Аьлимурадовди къайд гъапIганси, РД-йин культурайин министерствойиан республикайин вари районариъ ва гъулариъ 10, 20, 30 йисан культурайин цирклиъ лихурайи вакиларин аттестация апIувал ккун апIурайи кагъзар дуфна. Гъийин йигъан ихь районариъра, 30 йисахьна лихури, чпин пишекарвалин дережа саб ражарикьан за дарапIу вакилар а.
«Табасаран райондин глава Мягьямед Къурбановди ич улихь, райондиъ айи вари клубариз душну, йишвариин фици ляхин кIули гъабхураш ахтармиш апIбан месэла дивну. Клубар, культурайин хулар саки вари аьхю гъулариъ ерлешмиш духьна. Сабпибди Хюрикк сельсоветдихъан хъюгънийча. Хюрикк гъул’ан Пилигъна, дилин – Къужникна, хъасин Жулжагъна, Турифна, НичIрасна, ТIюрягъна, яна гъийин йигъаз 15 гъулаз гъушунча.
ИкибаштIан, клубдин ра-ккин абцциган ваъ, гьадму раккнихъна гъяйиз, клубди ляхин апIураш-апIурадарш аьгъю шулу. Гьарсаб гъулаз учу гъушу вахтна, клубдин кIулиъ айидарихьан, дурари гъулан мектебдиъ урхурайидарихъди фициб ляхин гъабхураш, гьерхраза. Кьюб кIуру суал кружокарихъди аьлакьалуб вуйиз.
Гизаф гъулариъ Урусатдин халкьарин культурайин аьдати центрар арццна. Эгер саб хулаз улихьдин гъаб-гъажагъ уч дапIну, дурар цIарнахъди дивну, раккнар хъерхьнаш, дидиз центр кIурдар. Душваз мектебдиъ урхурайидар, гъулан жигьилар хъади гъюри, экскурсйир тешкил апIури табасаран милли палатдикан, улихьдин гъаб-гъажагъдикан, гъулан ва хизандиъ ишлетмиш апIури гъахьи алатарикан, бакришнарикан ктибтури ккунду. Музейси ккабалгну абццнайи центриз гъюз юкIвра шулу. Хъа ухьу дурарикан баяр-шубариз улулупиш, дурариз думу алатар, кюгьне палтар, авадлугъар сабра аьгъю шулдар. Мидланра гъайри, культурайин идарйирин кIулиъ айидарихьан терроризмдиз, наркоманияйиз, алкоголизмдиз аьксиди гъахурайи серенжемарин гьякьнаанра гьерхрача, лигбан пособйир фицдар аш, ахтармиш апIурача. Гъи гизаф рягьятвалар арайиз духна. Дюн’яйин фунуб кIулихъ хъашра, багъри гъулаъ гъягъюрайи сумчрариз, серенжемариз телефондин прямой эфирариан лигуз мумкинвал дубхьнахьуз. Гьаддиз клубарин вакилари чпин ляхин социалин сетариан улупну ккунду. Тамам апIурайи ляхин улупударш, шли фу ляхин апIураш, я райондин кIулиъ айидариз, я республикайин культурайин министерствойиз хабар шулдар. Гъи социалин сетарин девир дуфна. Ухьура деврихъди душну ккунду.
Гьяйифки, хайлин йисари ляхин апIури, хъа культура фу вушкьан аьгъдру вакиларра алахьуру. Узуз, мисалназ, ТIюрягъ гъулан культурайин хулан директор Сураят Гьяжикеримова дицисдариз намунади улупуз ккундузуз. Дугъу, чан яшариз дилигди, улихьнаси компьютерин курсар дудургъну дуфна. Миди думу директорин чан ляхнихъ юкIв хъимбуваликан кIура. Хъа бязидар, жигьилар вушра, чпин ляхнихьна вижнасузди янашмиш шула, ишлетмиш апIуз хъадаънайи лигбан пособйиркьан керхуз даршулайидарра а. Гьаддиинди ляхин апIурайидарин ва кьяляхъ гъузрайидарин ляхниз кьимат дивуз шулу. ИкибаштIан, ляхниъ камивалар деетурайидарихъди учу сифте насигьят жюрейиинди сюгьбатар гъурхунча. Дурар чпи апIурайи ляхнин важиблувалин гъавриъ тIаърача. Хъа гьякьикьи аьгьвалат райондин главайин улихьна адабгъурча», – гъапну Аьлимурад Аьлимурадовди.
Дугъан гафариинди, гьелелиг райондиъ культурайин аьгьвалатназ бегьем вуйи кьимат тувуз шулдар. ИкибаштIан, гъагъи гьялнаъ айи клубарра а. Хъа клубарин идарйирин расвалин месэл-йир, ихь райондиъси, вари республикайиъра учIрудар ву. Аьлимурад Аьлимурадовди къайд гъапIганси, гьамус ухьуз расвалин ляхнар гъахуз кюмек вуди федералин программйир тешкил апIура, инвесторарин ва гьюкуматдин кюмекниинди вуйи проектар гьяракатнаъ а. Программйириъ ва проектариъ иштирак хьпан бадали, клубдин идарайи ляхин апIури ккунду.
«Табасаран райондин вари гъулариъ ахтармишар гъахбан кьяляхъ, узу аьхю анализ апIидиза. Хъа гъийин йигъаз узу гъушу 15 гъулкан варитIан ужуди ляхин апIурайибси ТIюрягъ гъулан клуб улупуз шулзухьан. Пилигъ гъулан культурайин хулан яратмиш апIбан ляхинра ужуди ккабалгну гъябгъюра. Жулжагъ гъулан клубра дурарин кьяляхъ гъубзрадар. Гьеле узу райондин гьацIар гъуларизкьан душнадарза, хъа ужуди лихурайи клубар хъана ашул кIури, миж кивуз ккундузуз. ИкибаштIан, гьял дапIну ккуни гизаф месэлйир айи клубар хайлин а. Гизафдари чпин аьрзйир учуз ачухъ гъапIну. Учу дурар вари райондин главайин улихьна адагъурча»,
– аьлава гъапIнийи Аьлимурад Аьлимурадовди.
Ав, му макьалайиъ ухьу лигурайи месэлайин гьякьнаан гьелелиг натижа йивудархьа. Райондин вари клубарин ужагъар ахтармиш апIбан кьяляхъ, Аьлимурад Аьлимурадов я редакцияйиз хялижвди гъиди, ясана телефондиан учухъди сюгьбат гъабхиди. Гьякьикьи аьгьвалат фициб вуш аьгъю апIуз думукьан вахт имдар.
