2021-пи йисан хьадан вахтна Урусатдин бицIидар рягьятвал гъадабгъбан ва чпин сагъламвал мюгькам апIбан серенжемарихьна гьязур хьпан бадали, РФ-дин мярифатнан министерствойи Роспотребнадзорин кIулин управлениейихъди сатIиди гьязур дапIнайи методикайин табшуругъар ихь гьюкуматдин вари регионариз хътаъну.
Йишвариин али жавабдар идарйириз хьадан рягьятвал гъадабгъбан кампанияйиъ ляхин шлубкьан гизаф бицIидари рягьятвал гъадабгъруганси тешкил апIуз табшуругъар тувну. Лагерариз гъягърударин сиягьнаъ уьмур хъапIбан гъагъи аьгьвалатнаъ айи хизанариан вуйи веледар, медицинайин гъуллугъчйирин ва коронавирусдин инфекция-йихъди женгнаъ айи жара вакиларин, ва гьацира коронавирусдин тIягъюн ачмиш хьпахъди аьлакьалуди ляхнихьан гъахьи абйир-бабарин бицIидар а.
Гъябгъюрайи йисан хьадан вахтна Дагъустан Республикайиъ баяр-шубари рягьятвал гъадабгъбан ва сагъламвал мюгькам апIбан кампанияйиз 280 миллион манат жара дапIна. Гъябгъюрайи йисан Дагъустандиъ 30 агъзурихьна бицIидариз ва живанариз хьадан вахтна рягьятвал гъадабгъуз мумкинвал хьибди. Гъийин йигъаз республикайин реестрин гьисабназ 29 шагьрарихьан ярхлади ерлешмиш духьнайи ва 111 мектебарин бинайиинди арццнайи бицIидарин лагерар гъадагъна.
Роспотребнадзорин РД-йиъ айи управлениейин тербия ва аьгъювалар тувбан шартIариин гюзчивал гъабхру отделин начальник Марина Рамазановайи къайд гъапIганси, хьадан вахтна бицIидари рягьятвал гъадабгъру серенжемарихъан жавабдар комиссия тешкил дапIна. Думу комиссияйин асас вазифйирикан саб – бицIидарин лагерариъ коронавирусдиан иццру хьпан дюшюшар арайиз гъюз гъидритувал ва санитарвалин къайда уьбхювал ву.
«Мани хураг гьязур апIбахьна, убхъру штун марццишнахьна, бассейнарихьна ва баяр-шубар дахъру йишварихьна вуйи тIалабарра мюгькам дапIна. Урусатдин мярифатнан министерствойиан дуфнайи цIийи тIалабариз асас вуди, бицIидарин лагерариъ лихуз гъюру вари гъуллугъчйири коронавирусдиз аькси прививка дапIнади ккунду. Мидланра гъайри, хьадан вахтна нубатниинди лагериъ лихурайи фунур вушра вакилиз чан нубат ккудубкIайизкьан лагерин аьтрафарилан тинди улдучIвуз ихтияр адар. Чарасузвал ва жюрбежюр жара себебар духьну, лагериан удучIву касариз кьяляхъ гъюз къадагъа дапIна»,
– гъапнийи Марина Рамазановайи.
