Майдин 18-пи йигъан вахтназ вуди Дагъустан Республикайин Главайин вазифйир кIулиз адагъурайи Сергей Меликовдин регьберваликкди РД-йин террориствализ аькси комиссияйин ва Оперативный штабдин сатIи вуйи заседание кIули гъубшну.
Заседаниейиъ РФ-дин РД-йиъ айи УФСБ-йин, РФ-дин РД-йиъ айи Федералин милли гвардияйин управлениейин, РД-йин МВД-йин кIулиъ айидар, правительствойин членар, министерствйирин ва идарйирин улихь-кIулихь хьайидар, муниципалин образованйирин главйир иштирак гъахьнийи.
Республикайин кIулиъ айири чан улхувал Казандиъ гъахьи пашман гьядисйирилан ккебгънийи: «Гьяйифки, аьхиримжи йисари му жюрейин дюшюшар ихь уьлкейиъ кми-кмиди арайиз гъюз хъюгъна. 2018-пи йисан Керчдиъ, гьаму йисан мартдин вазлиъ – Подмосковьейиъ, гьамус – Казандин мектебдиъ бицIидар йивну гъийихну. Гьамцдар дюшюшари агьалйир террориствалин гьяракатарихьан уьрхру уьлчмйир кьабул апIуз мажбур апIура», – гъапнийи дугъу.
Сергей Меликовди къайд гъапIганси, заседаниейиъ террориствализ аьксивал улупбахъди сабси, тахсиркрари гьюжум апIру дараматар уьрхювалин месэлйирра гьял дапIну ккунду. Татарстандиъ гъабхьи жюрейин пашман дюшюш Дагъустандиъра текрар даршлуганси ляхин гъабхувал лазим ву.
Чан фикир ачухъ апIури, региондин кIулиъ айири, гъаравулвал гъабхувал мюгькам гъапIну кIури, чIуру кьаст айи инсанар дерккуз читинди вуйиваликан гъапну. Дугъан гафариинди, яракьдин эйсйирин зиин гюзчивал гъабхуб лазим ву. Гъи инсандихьан яракь масу гъадабгъуз шулу, хъа цIиб вахтналан дугъан сагъламвалин аьгьвалат чIур хьубра мумкин ву. Натижайиъ гьацдар касарикан зарар шулу.
Образованиейин ва медицинайин идарйир, гизаф инсанар уч шлу йишвар уьрхювал тямин апIувал къанун уьбхру, кьувватнан органарин, вари жямяаьтдин улихь дийибгънайи асас месэла ву. Заседаниейиъ къайд гъапIганси, республикайиъ террориствалин алжагъуваларихьан образованиейин идарйир уьрхбан тIалабар тамам апIбиин гюзчивал гъабхру идарйирин арайиъ вуйи рабочий десте тешкил апIиди. Думу десте МВД-йин, Росгвардияйин, депутатарин корпусдин, РД-йин образованиейин ва илимдин, РД-йин культурайин, РД-йин жигьиларин политикайин ва РД-йин спортдин министерствйирин вакиларикан ибарат хьибди.
