Майдин 21-пи ва 22-пи йигъари Табасаран райондин мектебариъ 11-пи класс ккудубкIурайи 398-выпускникдиз ва 9-пи класс ккудубкIурайи 712 урхурайидариз аьхиримжи зенг гъивну. Вари мектебариъ райондин администрацияйин, УО-йин вакиларин, мялимарин, жюрбежюр пишекрарин ва урхурайидарин, мяълийир, ялхъвнар апIбан дестйирин, гъирагъдиан дуфнайи хяларин, абйир-бабарин иштирак’валиинди му машквриз бахш дапIнайи, урхбан йис ккудубкIбахъди аьлакьалу серенжемар кIули гъушну.
21-пи майдиъ аьхиримжи зенг Табасаран райондин Хючнаарин 1-пи нумрайин лицейдиъ гъивну. Думу шадлугънан серенжемдиъ Табасаран райондин глава Мягьямед Къурбанов, республикайин Халкьдин Собраниейин депутат Алавудин Мирзабалаев ва жара касар иштирак гъахьнийи.
Мягьямед Къурбановди лицейдин выпускникар ва мялимар райондин администрацияйин терефнаан му машкврихъди мубарак гъапIнийи. «Ичв мектебдихьан чан выпускникариинди дамагъ апIуз шулу, дурарин арайиъ лайикьлу мялимар, духтрар, культурайин цирклин гъуллугъчйир, юристар, экономистар а, дурар гьюкуматдин жюрбежюр регионариъ лихура. Ичв улихьра кIул’инди вуйи уьмриз раккнар тIаъна. Гьамусяаьт учвуз аьхи-римжи экзаменар ккилигура, хъасин ичв улихь урхуз кучIвру институт ва пише ктабгъувал, ачмиш шулайи цIийи мумкинвалар дийигъна. Мектебдиъ гъадагъу аьгъювалари учвуз ичв улихь дивнайи метлебарихъ хъуркьуз, ичв кIваъ айи планар ва хиялар кIулиз адагъуз кюмек апIур кIури, умуд кивраза», – гъапнийи Мягьямед Къурбановди.
Хъасин дугъу 3-пи классдиъ урхурайи Дилфруз Сяидовайиз «Йисандин варитIан ужуди урхурайир» кIуру номинацияйиъ гъалиб хьпаз райондин главайин ччвурнахъан вуйи стипендияйин сертификат тувнийи ва шуран абйир-бабариз аьхю чухсагъул мялум гъапIнийи.
Алавудин Мирзабалаевдира, урхурайидар машкврихъди мубарак апIури, ццийин выпускникарира Хючнаарин лицейдин ад асккан дарапIур ва дурари уьмриъ, урхбаъ ужудар хъуркьувалар гъазанмиш апIур кIури, чав умуд киврайиваликан гъапнийи.
Лицейдин директор Жейран Къулиевайи чан удучIвну улхбаъ выпускникарикан 11 йисан аьгъювалар гъадабгъу мектеб ва тербия туву мялимар кIваълан гьадраувал ккун гъапIнийи. «Учвуз гьарсаб ляхниъ хъуркьувал ва ягъурлувал ишри», – аьлава гъапIнийи директори.
Серенжемдин аьхириъ ккудубкIру зенг гъивнийи ва концертдин программа улупнийи.
* * *
22-пи майдиъ Табасаран райондин главайи Хючнаарин 2-пи нумрайин кьялан мектебдиъра шадлугънан серенжемдиъ иштирак’вал гъапIнийи. Выпускникар райондин администрацияйин терефнаан му йигъахъди тебрик дапIну, Мягьямед Къурбановди Хючнаарин 2-пи нумрайин кьялан мектеб райондин варитIан ужудар мектебарин цIарнаъ айиваликан гъапнийи.
«Мектебдиъ урхури имиди учву аьгъюваларин лап аьхю «гъагъ» уч гъапIунчва. Учвкан гьарсари дурар уьмриъ ишлетмиш апIур ва жвуван рякъ абгур кIури, умуд кивраза.
Гъи райондиз вари цирклариан ужудар пишекрар лазим ву. Учу учвук аьхю миж киврача, учвкан ихь райондин ва республикайин гележег асиллу ву. Учвкан ихь Ватандин лайикьлу ватандашар ва ватанперверар шлувалиин умудлу вуза», – гъапнийи Мягьямед Къурбановди, выпускникарихьинди илтIикIну.
Серенжемдин дахилнаъди райондин кIулиъ айири, ужуди урхурайи Ислам Аьбдулгьямидовдиз райондин главайин ччвурнахъан вуйи стипендияйин сертификат тувнийи.
Выпускникар машкврихъди абйир-бабари, сабпи мялимари, классдин руководителари мубарак гъапIнийи. Дурари выпускникар мектеб ккудубкIувалихъди тебрик гъапIнийи, мяналу насигьятар тувну, дурариз гележегдин уьмриъ ягъурлу рякъ, чпин мурад-метлебарихъ хъуркьувал ккун гъапIну.
Выпускникари чпин терефнаан мялимариз, абйир-бабариз, уч духьнайидариз мяълийир гъапIнийи, шиърар гъурхнийи ва кюкйир багъиш гъапIнийи.
Сабпи классариъ урхурайидари выпускникариз кюкйир тувбалан кьяляхъ, аьхиримжи зенг гъивнийи.
* * *
Райондин администрацияйин вакилар му йигъан Табасаран райондин гимназияйиъ кIули гъябгъюрайи шадлугънан серенжемдиъра иштирак гъахьнийи.
Табасаран райондин глава Мягьямед Къурбановди гъапиганси, цци мушваъ сабпи ражари вуди урхурайидар гимназияйиккан ккадаура. «Учву Урусатдин фунуб йишваз урхуз гъушишра, Табасаран райондин гимназияйин ад батIул мапIанай. Узу учвуз ЕГЭ-йин имтигьнар тувбаъ ва ичв гъюз-имбу уьмриъ аьхю хъуркьувалар ккун апIураза», – къайд гъапнийи дугъу, выпускникарихьинди илтIикIну.
ВаритIан ужуди урхурайидариз главайин ччвурнахъан вуйи стипендияйин сертификатар, хъа дурарин абйир-бабариз жямяаьтлугъдин ла-йикьлу вакилар тербияламиш апIбаз чухсагъул мялум апIбан кагъзар тувнийи.
Серенжемдин аьхириъ мектебдиъ урхурайидари гьязур дапIнайи концертдин программара улупнийи.
