Ухьуз мялум вуйиганси, 2012-пи йислан башламиш дапIну, Урусатдиъ «Земский мялим» ва «Земский духтир» программйир кьувватнаъ а. Аьхиримжи йисари думу программйир Табасаран райондиъ хъуркьувалиинди уьмриз кечирмиш апIура.
Федералин программйирин метлеб – образованиейин ва сагъламвал уьбхбан цирклариъ ляхнин мянфяаьтлувал за апIбан бадали, гъулариз жигьил мялимар ва жигьил духтрар жалб апIувал ву. Программайиъ иштирак шулайидар гъулаъ ляхнихъди тямин апIура, дурариз яшайишдин гъулай шартIар яратмиш апIура, яшамиш шлу хулар масу гъадагъбан бадали, саб миллион манат тувра.
Майдин 31-пи йигъан Табасаран райондин кIулиъ айи Мягьямед Къурбанов «Земский духтир» ва «Земский мялим» программайиинди райондиъ лихурайи жигьил пишекрарихъди гюрюшмиш гъахьну. Гюрюшдиъ Мягьямед Къурбановди гъулариъ лихурайи жигьил пишекрариз гьацI йисак саб ражари гюрюшмиш хьувалин теклиф гъапIну. «Ичв терефнаан теклифариз ккилигурача, ляхнихьна вуйи маракьлувал дудубгну ккундарчуз, хьуд йис улдубчIвбан кьяляхъра учву гъулариъ лихури гъузну ккундучуз», – гъапну дугъу.
Райондин кIулиъ айирин гафариинди, жигьил пишекрарихьан деврин медицинайин тIалабариз жаваб туврайи заан технологияйин авадлугъарихъди ляхин апIуз рягьятди удукьуру. Райондин сагъламвал уьбхбан цирклин гъуллугъчйири, райбольницайиъ цIийи оборудованиейихъди лихуз шлу эндокринологар, ювенологар, бицIидарин духтрар гьаур, дурари аьхю тажруба айи духтрарихъди сабси ляхин апIур кIури, умуд кивра.
Табасаран райондин мектебариъ физикайиан, информатикайиан, харижи чIалариан дарсар кивру мялимарин кьитвал гъубзра. Райондин образованиейин управлениейин начальник Аьбдусалам Гьясановди къайд гъапIганси, гележегдиъ программайиъ иштирак хьуз ккунидариз ляхин апIуз лазим вуйи вари шартIар яратмиш апIиди. Июндин 11-пи йигъаз http://zemteacher.apkpro.ru сайтдиъ регистрация дапIну, программайин иштиракчи хьуз мумкинвал а. Программайин иштиракчйириз гележегдиъ ляхниъ хъуркьувалар гъадагъуз мумкинвалар хьибди, амма мялимарин ляхнин терефнаанра ужудар улупбар лазим ву.
Гюрюшдиъ райондин жигьиларин центрин директор Рамис Рамазановди жигьил пишекрарихъди ляхин гъабхуз, дурариз жигьиларин форумариъ ва грантарин конкурсариъ иштирак хьуз мумкинвал тувуз учв гьязур вуйиваликан гъапнийи. Дидланра савайи, дугъу Мягьямед Къурбановдин теклифнахъди райондин депутатарин Собраниейин гъвалахъ хъайи Жигьиларин парламентдин дахилназ серенжемдиз уч духьнайи жигьил пишекрар сабпи нубатнаъди кьабул апIувал – учв рази вуйивал тасдикь гъапIнийи. Культурайин серенжемар сатIиди планламиш апIували ляхник гьяракат кипди, сар-сарин ляхнин тажрубайихъди таниш апIиди
