Къизлар райондин хайлин гъулар дюгю гьясил апIурайидар ву. ИкибаштIан, думу гъуларин хутIлариз шид лазим вуйивализ лигну, дюгю ккадабцIурайи гьарсаб гъулаз гъанавар йирккну, шид дизигна. Гьацдар гъуларикан саб – Косякинский гъулан поселениейиз дахил шулайи Первомайское гъул ву.
Улихьна йигъари му гъулаъ саб аьдати дару дюшюш гъабхьну. Табасаран райондин НичIрас гъул’ан Къизлар райондин Первомайское гъулаз кючмиш духьнайи Фарзялиеварин хизандиан вуйи, цци сабпи класс ккудубкIу Муслим Фарзялиевди (шиклиъ) игитвалин ляхин гъапIну. Дугъу 1,5 метрин ичI айи гъанавдин гъирагъдихъ тамшир апIурайи вахтна, лик ккутIубчIвну, гъанавдикк ккахъу чан классдиан вуйи бай Къурбан аьжалихьан гъюрхну.
«Дарсарин кьяляхъ Муслим хулаз дуфну, палтар гьюдюхну, китабар айи чанта хулаъ гъибтну, велосипеддиинди яртуз чIатариз удучIвураза дупну, гъушну. Саб арайилан палтар кацIну хулаз кьяляхъ гъафири узуз дишлади, чан классдиан вуйи бай Къурбан гъанавдиккан ккадагъунза кIури, хабар тувну. ЦIийина дугъу гъапибдиз дици фикир тувундарза. ВуйиштIан, дугъриданра, Муслимдина дугъан дустру, кьюбпи класс ккудубкIу Ислам Аьлиевди, штукк ккахъу бицIир дишлади ккадагъну. Кюмек тIалаб апIури, чIигъар гъеерхьубси, Муслим кюмекназ гъажаргъну, амма чахьан сарихьан му ляхин кIулиз адабгъуз удудукьруб аьгъю гъабхьиган, дустраз дих гъапIну. Дурари кьюридди гьяракатниинди штуккан Къурбан ккадагъуз хъюгъну. Сифте кIул’ан маргъар гьачIаккну, хъа кюмек даршулайиб аьгъю гъабхьиган, хамхрин кьатI дабгну, гьаддин кюмекниинди чахъди саб классдиъ урхурайи бализ кюмек гъапIну», – ктибтну кIубан балин дада Фаина Фарзялиевайи.
Игит балин дадайин гафариинди, аьжалихьан гъюрхю Къурбандин баб дишлади Муслимдиз чухсагъул кIуз гъафну. Хъа му гьядисайикан яркьуди хабар гъарабгъиган, Муслим урхурайи мектебдиъ линейка тешкил дапIну, варидарин улихь дугъаз мектебдин директори, мялимари ва урхурайидарира чухсагъул мялум гъапIну. Дидин кьяляхъ Косякинский гъулан поселение-йин администрацияйиан ва Къизлар райондин образованиейин управле-ниейиан Муслимдиз хайлин пешкешар тувну.
Мициб кIубанвал улупбаз Муслимдиз ва чпин велед гьамциб ижми юкIв ади, гьаммишан кюмекнан хил гьачIабккуз гьязур вуди тербияламиш апIбаз дугъан абйир-бабариз «Табасарандин нурар» газатдин коллективдин терефнаанра чухсагъул мялум апIурача.
