Улихьна йигъари республикайин энергетикайинна ЖКХ-йин министерствойин делегация, министр Ризван Мурадовра кIулиъ ади, Дагъустандин Огни шагьриз ва Табасаран райондиз гъафну.

 

Му муниципалитетариз гъюбан себеб – электроэнергияйихъди аьалакьалу вуйи месэлйир гьял апIувал вуйи.

Сабпи нубатнаъди министерствойин делегация Дагъ.Огни шагьрин глава Жалалудин Аьлирзаевдихъди сатIиди шагьриз манишин туврайи котельнйирин гьял фициб вуш ахтармиш апIуз гъушну. ГъапIу ахтармишариан ашкар гъабхьиганси, гьамусяаьт Дагъ.Огнийиъ лихурайи котелар 1942-пи йисан гьясил гъапIдар ву. ИкибаштIан, дурар сарун лихру гьялнаъ имдар. Гьаци вуйиган, шагьриз хулар-дараматариз манишин тувру фаслихьна гьязур дубхьнайивалин паспорт тутруври, магьа швнуд-сад йис ву. Ризван Мурадовди къайд гъапIганси, гьамусяаьт му месэла республикайин улихь-кIулихь хьайидари ва чав министри хусуси гюзчиваликкна гъадабгъна.

«Шагьриъ электроэнергия-йихъди аьлакьалу вуйи месэлара гъагъиди ву. Мушваъ кми-кмиди аквар ктIушвурайиваликан мялум вузуз. Янаки шагьриъ агьалйир лазим вуйиганси электроэнергияйихъди тямин дапIнадар.

Мидин гьякьнаан минис-терствойиз инсанарихьан кми-кмиди аьрзйир гъюра. Гьятта месэла гъагъиди айивализ лигну, магьа улихьнаси шагьрин агьалйири, машинар гъягъру федералин рякъюз удучIвну, думу хъябкьну. Шагьрин глава Жалалудин Аьлирзаев, му аьгьвалат гьяракатниинди дигиш апIбан бадали, кюмек ккун апIури «Россети Кафари Кавказ – Дагэнерго» ПАО-йин контр-агентарихьна илтIикIну. Чпин нубатнаъ дурари, тешкилатдин хиликкна трансформатор тувуз ва думу гьюдюхюз гъитну, шагьрин агьалйир аквнахъди тямин гъапIну. Амма, гьяйифки, саб бицIи вахтналан аквар ктIушвувал хъанара давам хьуз хъюгъну.

Электроэнергияйин ва ЖКХ-йин циркларихъди аьлакьалу месэлйир гъитIирккбан бадали, шагьрин админис-трацияйиъ, администрацияйин вакиларра ва жямяаьтлугъ касарра уч дапIну, совещание гъубхунча. Урусатдин Президентдин Посланиейиз ва РД-йин Главайин табшуругъариз асас вуди, совещаниейиъ шагьрин электросетдин кIулиъ айирихъди ва шагьрин администрацияйин аппаратдихъди читин месэлйир гъитIирккну, дурар гьял гъапIунча.
Мидланра гъайри, шагьрин агьалйирихьан, администрацияйин ва жямяаьтлугъ вакиларихьан вуйи аьрзйир кьабул дапIну, му читин месэлйир гьял апIбан бадали, йиз заместителаризра табшуругъар тувунза», – ктибтнийи узуз телефондиан вуйи сюгьбатнаъ республикайин энергетикайинна ЖКХ-йин министр Ризван Мурадовди.

Совещаниейиъ 2021-2022-пи йисарин хулариз манишин тувбан фасил улубкьбахьна гьязур хьпан месэлара гъитIибккну. Думу вахт улубкьайиз, гьелелиг газ дизигну адру йишвар (дибдиан рас апIурайи хулар, коммерция-йин дару багъбанчивалин жямяаьтлугъар, дачйир) фукьан вуш ахтармиш, тамам дапIну ккуни ляхнарин кьадар ва дурариз удубчIвру кьимат агъю дапIну, 30-пи майдиз министри чаз мялум апIуб ккун гъапIнийи.

Гюрюшдин натижйириинди, министри шагьрин улихь-кIулихь хьайидариз Дагъ. Огнийиъ айи, эйси хътру элекросетдин мяишатдин объектар къанунди тIалаб апIурайиганси гьисабназ гъадагъбан, хъа манишин тувру котельнйирин багарихь йи-швар марцц дапIну, къайдайиз хпан табшуругъар тувну.
Мидин кьяляхъ министерствойиан вуйи делегация «Россети Кафари Кавказ – Дагэнерго» ПАО филиалин кIулиъ айи Мегьямед Аьбдурашидовра ва РД-йин Халкьдин Собраниейин депутат Алавудин Мирзабалаевра хъади Табасаран райондиз гъубшну.

Къайд апIуз ккундузуз, Табасаран райондин электросетарин начальникдин хиликк Хив районра ккайивализ лигну, райондин администрацияйиъ кIули гъубшу гюрюшдиъ му кьюбиб районариъра электроэнергия кми-кмиди ктIубшвурайивалин гьякьнаан месэла гъитIибккну. Асас вуди Хив райондин 450-тIан артухъ агьалйир яшамиш шулайи ЦIудухъ гъулаъ вахт-вахтарик ктIушвурайи акварин гьякьнаан электросетдин начальникдиз министри совещаниейиъ тюмбюгъ гъивну.

«Пуз ккундузузки, Мягьямед Аьбдурашидов йиз теклифниинди райондиз гъафир ву. Фицики, райондиъ электроэнергияйихъди аьлакьалу месэла гъагъи гьялнаъ айиваликан узуз агъязуз. Совещаниейиъ Мягьямед Аьбдурашидовди чвлин ва кьюрдун фаслихьна гьязур хьпахъди аьлакьалу вуди «Россети Кафари Кавказ – Дагэнерго» ПАО-йи Табасаран райондиъ планламиш дапIнайи серенжемариканра мялум гъапIну», – давам гъапIнийи министри ич сюгьбат.

Мидланра гъайри, му йигъан райондин администрацияйиз дуфнайи хялари ра-йондин агьалйир ва гъуларин поселенйирин главйир кьабул гъапIну (шиклиъ). Гюрюшдиз дуфнайидарин асас аьрзйир электроэнергия ва шид гьубкIну адрувалихъди аьлакьалудар вуйи. Уч духьнайи агьалйирин аьрзйирихъ хъебехъну, Ризван Мурадовди дурариз му месэлйир гьамусяаьт республикайин улихь-кIулихь хьайидари гьял апIурайиваликан мялум гъапIну ва тялукь уьлчмийир чпин министерствойин терефнаанра кьабул апIуз гаф тувну.