Фициб чIуру гьядиса гъабхьишра, сабпи нубатнаъди кюмекназ хъуркьрайидар МЧС-дин гъуллугъчйир ву. Пуз шулуки, жара касдиз кюмек апIбан бадали, дурари гьаммишан чпин уьмрар хатIайикк ккирчра.
Гъи узуз йиз макьалайиъ гьацдар кIубан касарикан сар вуйи, Каспийск шагьриъ айи МЧС-дин управлениейиъ цIийир ктIушвру машиндин аьхюну инструкторди лихурайи ихь ватанагьли, Хив райондин Заан Яракк гъулан вакил Урцмихан Урцмихановдикан (шиклиъ) ктибтуз ккундузуз.
Урцмихан Амирхановичди жвуван уьмриз аьхю хатIа айи, заан жавабдарвалин ва жара бедбахтваларихьан уьрхру му ляхин 2011-пи йисхъан мина апIура. МЧС-диъ ляхниъ учIвайиз, дугъу армия-йиъра хатIасузвалин частнаъ Ватандин улихь чан буржи тамам гъапIну. Армияйиан кьяляхъ гъафир, му рякъ чав давам апIрувалиин думу инанмиш вуйи. Гьаци гъабхьнура ву, дугъу чаз маракьлу ляхин давам гъапIну.
Урцмихан Урцмихановди инсанар бедбахтваларихьан уьрхбан гъуллугънаъ ляхин апIури, магьа 10 йис ву. Му йисарин арайиъ дугъаз фукьан-вушра хатIалу, читин дюшюшарра алахьну. Дугъу фукьан-вушра карханйириъ цIийир ктIуршвну, йицIбариинди бедбахтвалин дюшюшариъ инсанар ва дурарин мал-девлет цIихьан гъюрхну.
«Узу му пише ктабгъбан асас себеб – инсанариз кюмек апIувал вуйиз. Йиз фикриан, му варитIан рягьимлу ляхнарикан саб ву. Читин дюшюшнаъ ахъну, увкан кюмек ккун апIурайи инсанар гъяркъиган, кIваз лап аьхю тясир шулу. Гьаддиз узу, инсанар бедбахтвалин дюшюшариккан ккадагъбан рякъ кадабгъну, думу давам апIураза.
ЦIа ктIубшвру машиндин аьхюну инструктор вуйивализ лигну, уз’ин аьхю жавабдарвалра алз’ин. Гьарсаб цIа кабхънайи йишвхьан дих гъяйиз, узу хъапIрайи машин гьаммишан абцIну шид ади, лазим вуйи вари алатарихъди тямин дапIну, дих гъапIу йишвахьна дишлади удучIвуз шлуганси гьязурди гъибтраза. МЧС-диз ляхниз гъяйизра, узу му ляхнихъди ужуди таниш вуйза. Гьаддиз ляхънихъ хъюгъруган, читинвалра зат алабхъундарзуз», – кIура Урцмихан Урцмихановди.
Жиниб дар, му гъуллугънан ляхин гизаф хатIалуб ву. ЦIа кабхъбан вая авария хьпан гьарсаб дихназ му гъуллугънан вакилар наан ашра 10 дакьикьайин арайиъ хъуркьну ккунду, фицики инсанарин уьмур вая дурариз айи мал-девлет гьарсаб секундайилан асиллу ву.
«ЦIа кабхъувал – лап гъагъи гьядиса ву. Швнуд йисариинди тикмиш гъапIу хулар, уч гъапIу мал-девлет цIа кабхъну саб-кьюб дакьикьайин арайиъ пуч хьувал гьарсар касдиз аьхю дерд ву. Учухьна хатIа-балайикан хабар туврайи сигнал гъафибси, дишлади лазим вуйи палатра алабхьну, рякъюн кIажра ва зенг гъапIурин телефондин нумрара гъадабгъну, рякъюъ учуз жара машинари рякъ тувбаз вуйи сиренара кабхьну, гьяракатниинди дих гъапIу йишваз гъягъюри шулуча. Гьамкьан йисари лихури, гьелелиг машин шид адарди вая ичIиди хъапIну гъушу дюшюшар зат гъахьундарич. Амма инсанарин, цистернайиъ айи шид зат ккудубкIидар кIури, хиял ву. Гьяйифки, машиндин двигатель ва насос зарбди лихурайивалиан цис-тернайиъ айи шид саб бицIи манзил хьайизра ккудубкIуру. Гьаддиз хъанара машинар шид ади гьязурди гъитну шулич.
Гьацира пуз ккундузузки, наан цIа кабхънайи вая авария дубхьнайи йишвахьна хъуркьишра, учу сабпи нубатнаъди инсанар бедбахтвалихьан къутармиш апIбиин, хъасин дурарин мал-девлет уьбхбиин, гьаддихъди сабси цIа ктIубшвбиин машгъул шулуча.
Магьа гьамусяаьт гизаф цIийир кахьру вахт улубкьна. Гьар йигъан учу швнуб-саб йишвахьна цIа ктIубшвуз гъягъюрача. Асас вуди гьамусяаьт убгурайиб гъеебццу укI-кьал ву. Аьхюну пай дюшюшариъ тахсиркрарра инсанар вуди шулу. Гьаз гъапиш, гизаф касари цIа кимбу папрус наанди-вушра гатIабхьуру, вая рягьятвал гъадабгъуз гъушу йишварихь кипу цIа ктIутIубшвди кьяляхъ гъюру. Натижайиъ хатIалу дюшюшар арайиз гъюру», – аьлава гъапIнийи цIа ктIубшвру машиндин аьхюну инструктори.
