РД-йин Муфтиятдин председатель Шамил Аьлиханов, республикайиъ коронавирусдин тIягъвнихъди аьлакьалу аьгьвалат айибтIан пуч шулайивализ лигну, Дагъустандин агьалйирихьна илтIикIну.

 

«Гьюрматлу чвйир ва чйир, аьзиз дагъустанлуйир!

Гъи ихь республикайиъ хъана читин аьгьвалат арайиз дуфна. РД-йин сагъламвал уьбхбан министерствойин улупбариинди, республикайин аьтрафариин коронавирусдин тIягъвни агъавал апIура. Гьар йигъан больницйириъ ккаърайи аьзарлуйирин кьадар артухътIан артухъ шула. Ихь сатIи вуйи метлеб – COVID-19-диз аьксивал улупувал, тIягъюн тарабгъувалин кьадар шлубкьан яваш апIувал ву.

Гьюрматлу дагъустанлуйир! Учвкан ккун апIурайиб – Роспотребнадзорин тIалабар тамам апIувалихьан ярхла дархьувал, хъа лазимди вуш, духтрин теклифниинди руб йивувал вуйихь.

Учвкан гизаф инсанар айи йишвариъ уч дархьувал, жюрбежюр серенжемариъ иштирак’вал цIиб апIувал, чарасузвал адарди багахьлуйирихъди ва дустарихъди гюрюшар тешкил дарапIувал ккун апIурача.

Зиихъ ктуху теклифар гьясбикк дарапIували инсанарин арайиъ коронавирусдин тIягъюн тарабгъувалин аьлава йишвар арайиз хиди. Гьаддихъди аьлакьалу вуди, динагьлийириканра ихтиятвал уьбхбан къайдйир тамам апIувал ккун апIураза.

Ухьу гьарсари, жвуван уьмрихъанси, ихь багахь хьайидарин уьмрихъанра ва дурарин сагъламвалихъанра аьхю жавабдарвал гъабхурайиваликан кIваълан гьапIну ккундар. Гъит Первердигар Аллагьди ухьуз сагъ’вал туври, ухьу хатIа-балайихьан уьрхри», – гъапну чан илтIикIбаъ Шамил Аьлихановди.