Цци, сабпи ражари вуди, Дагъустандиъ 49 выпускникди ЕГЭ 100 баллиз тувну. Улихьна йигъари думу кIубан баяр-шубарихъди вахтназ вуди республикайин Главайин вазифйир тамам апIурайи Сергей Меликов видеойин конференцияйин аьлакьайиинди гюрюшмиш гъахьну. Думу гюрюшдиз дуфнайидарин арайиъ ихь ватанагьлийирра — Табасаран райондин Хянягъ гъулан кьялан мектеб ккудубкIу, урус чIалнан имтигьяндиан 100 балл гъадагъу Насир Аьбдулгьялимов ва Каспийск шагьрин 2-пи нумрайин мектеб ккудубкIу, Хив райондин Фурдагъ гъулан’ан вуйи — тарихнан имтигьяндиан 100 балл гъадагъу Элиза Гьяжимурадова, айи.
Газатдин ккудубшу нумрайиъ Зубайдат Шябановайин «ЕГЭ-йиан 100 балл гъадагъну» макьалайиъ Насир Аьбдулгьялимовдикан дибикIнайи. Хъа гьаму нумрайиъ узуз Элиза Гьяжимурадовайикан бикIуз ккундузуз.
Учв Элиза бицIи классариан мина ужуди дарсар урхру, аьгъювалар айи риш ву. Чаз айи аьгъювалар дугъу ЕГЭ-йин натижйириинди улупну. Гьаци вуйиганси, дугъу тарихнан дарснаан ЕГЭ 100 баллиз, урус чIалнаан ‒ 96 баллиз ва харижи чIалнаан ‒ 90 баллиз тувну.
«Дюзди гъапиш, тарихнан дарснан имтигьян узу 100 баллиз тувур кIури, хиял дайиз. Натижа гъябкъиган, мюгьтал гъахьнийза. Фицики, му дарснаан артухъси агъювалар гъадагъуз узу репититорарихьна гъушундарза. Йиз фикриан, ужудар аьгъбвалар хьпан, имтигьнар заан баллариз тувбан бадали, сабпи нубатнаъди гьарсар кас мектебдиъ урхбан бицIи классариан мина жюрбежюр предметариан аьгъювалар гъадагъбиин чалишмиш духьну ккунду. Зегьмет гъизигиган, натижара ужуб шулу.
Гъийин йигъан ужудар аьгъювалариинди мектеб ккудубкIурайидариз республикайин улихь-кIулихь хьайидарира фикир тувра. Магьа улихьна йигъари республикайин Главайин вазифйир вахтназ вуди тамам апIурайи Сергей Меликов учухъди гюрюшмиш гъахьну ва гьаруриз чахъди гаф-чIал апIуз, суалар тувуз мумукинвал тувну. Миди, йиз фикриан, республикайин улихь-кIулихь хьайидарин уч’ин хъугъ’вал аливаликан ва учук умуд киврайиваликан кIура»,
— гъапну Элизайи.
Къайд апIуз ккундузузки, Элизайиз чан уьмрин пишеди харижи чIаларин таржумачи хьувал ктабгъуз ккунда. Дугъу чан документар МГУ-йиз ва Пятигорск шагьрин университетдиз хътауз планламиш дапIна. Гъийин йигъаз, иглис чIалнахъди сабси, дугъу япон чIалра дубгъура. Багарихьди аьраб чIал дубгъузра хъюгъди. Элизайин гафариинди, дугъу таржумачийин пише ктабгъбан асас меблет – жара гьюкуматариз гъягъювал, дурарин медениятдихъди таниш хьувал ву.
«Табасарандин нурар» газатдин терефнаан учу Элизайиз хъуркьувалар ва чан метлеб кIулиз адабгъуз кьувват ккун апIурача. КIваинди гъибтай, гьарсаб метлеб кIулиз адабгъбаъ варитIан асасуб ‒ кьаст ва жвуван гафналан улдудучIвувал ву.
