Йирхьубпи июлиъ Хючна гъулаъ айи культурайин Хулаъ Табасаран райондин отличникарин «Умуд» кIуру форум кIули гъубшну. Душваъ Табасаран райондин глава Мягьямед Къурбановди гьаму йисан уьмуми образование тувру мектебар заан хъуркьувалар гъазанмиш апIувалиинди ккудукIу 31 выпускник уьру аттестатар ва медалар тувбиинди, хъа райондин ва республикайин олимпиадйириъ, гъалиб гъахьи яратмиш апIбан жюрбежюр конкурсариъ дипломар гъадагъу 20 урхурайир – грантар пешкеш апIбиинди лишанлу гъапIну.
Шадлугънан серенжемдиз уч духьнайи абйир-бабарихьинди ва медалистарихьинди илтIикIну, Мягьямед Къурбановди гьамци гъапнийи:
«Учвкан райондин гъюзимбу уьмур асиллу ву. Анжагъ гъалибвал гъадабгъувалихьна вуйи гьяракатнутIан, юкIв хъади ляхин апIувалитIан хъуркьувалар гъазанмиш апIуз мумкинвал тувурдар. Гъи учву урхбаъ заан хъуркьувалар улупбак мялимарира, абйир-бабарира аьхю пай кивна. Учву, варитIан ужудар выпускникари, уьмриъ ужуб йишв бисур кIури, учвухъ гъизигу зегьмет райондиз, республикайиз ва уьлкейиз мянфяаьт хуз харж апIур кIури, умуд кивдихьа. Учвуз ичв гъюзимбу уьмриъ аьхю хъуркьувалар ишри!».
Хъасин райондин главайи урхурайидар пешкешарихъди лишанлу апIбан серенжем кIули гъубхнийи.
Мялимарин терефнаан удучIвну гъулху, Табасаран райондин гимназияйиъ урус чIалнанна литературайин дарсар киврайи, заан баллар гъадагъу выпускникар гьязур гъапIу мялим Гьаваханум Байрамялиевайи, выпускникарихьинди илтIикIну, гьамци гъапнийи: «Учву гъазанмиш дапIнайи хъуркьувалар учвуз гъюзимбу уьмриъ бакар хьиди. Ужуб образованиейи ичв кьисматназ тясир апIиди. Учву ичв мялимари учвухъ гъизигу зегьмет, учвуз туву аьгъювалар ва ккунивал чIур дарапIур, учвкан гьюрматлу инсанар шул кIури, умуд кивдихьа».
Абйир-бабарин терефнаан Мадина Мазалаева удучIвну гъулхнийи. Дугъу мялимари гъизигу зегьметназ ва райондин главайиз образование артмиш апIувализ фикир туврайивализ аьхю чухсагъул мялум гъапIну, выпускникариз жандин сагъ’вал ва урхуз кучIврайидариз ягъурлу рякъ ккун гъапIну.
Мягьямед Къурбановди 2021-пи йисан ЕГЭ-йиан 90 ва зиина баллар гъадагъу выпускникар-медалистар гьязур гъапIу мялимарра дипломар ва грамотйир тувбиинди лишанлу гъапIну. Магьа дурар:
Байрамялиева Гьаваханум Исмяиловна – Табасаран райондин гимназияйиъ урус чIалнанна литературайин дарсар киврайи мялим;
Аьбдуризакьова Селми Шарафовна – Хючнаарин сабпи нумрайин лицейиъ урус чIалнанна литературайин дарсар киврайи мялим;
Аскеров Тельман Аьбдулгьюсеевич – ЧвултIарин кьялан мектебдиъ урус чIалнанна литературайин дарсар киврайи мялим;
Рамазанов Арсен Шагьбанович – Хянгъярин кьялан мектебдиъ урус чIалнанна литературайин дарсар киврайи мялим.
Аьгьмедов Назим Мягьямедшерифович – Акъа гъулан кьялан мектебдиъ урус чIалнанна литературайин дарсар киврайи мялим;
Аьбдуллаев Тельман Рамазанович – Гелинбатандин кьялан мектебдиъ урус чIалнанна литературайин дарсар киврайи мялим;
Гьяжиева Эсбет Ражабовна – ГьепIларин кьялан мектебдиъ урус чIалнанна литературайин дарсар киврайи мялим;
Аьбдулова Замира Ибрагьимхалиловна – Хили-Пенжигьарин кьялан мектебдиъ урус чIалнанна литературайин дарсар киврайи мялим;
Къурбанов Гьяжибег Рамазанович — Гелинбатандин кьялан мектебдиъ обществознаниейин дарсар киврайи мялим;
Исаева Людмила Павловна — Табасаран райондин гимназияйиъ обществознаниейин дарсар киврайи мялим.
