Магьа Урусатдин вари регионариъ гъябгъюрайи йисан ЕГЭ тувбан натижйир йивру вахт аьхирихъна гъафну. Гьадму гьисабнаъди, ихь республикайин Дагъ. Огни шагьрин мектебариъ ццийин урхбан йисан гъазанмиш гъапIу хъуркьуваларикан, выпускникари туву имтигьнарикан ва гъадагъу балларикан шагьрин образованиейин управлениейин начальник Максим Аьлихановди «Табасарандин нурар» газатдиз мялум гъапIну. Дугъан гафариинди, мидиз улихьна йисариз гъилигиган, ццийин йисандин натижйир швнуб-саб ражари заандар гъахьну.

 

 

«Ццийин йисан урус чIалнаан туву имтигьяндин натижйирикан улхури, пуз ккунузузки, сачдихъди тевиган, цци выпускникари имтигьян, кьялан гьисабариинди, 68,7 баллиз тувну. Шагьрин мектебариан 154 выпускникди урус чIалнаан имтигьян тувну. Гьадрарикан 51 выпускникди думу 80-тIан артухъ баллариз тувну, хъа 2 выпускникдихьан ЕГЭ тувуз гъабхьундар. Профильный математикайин гьякьнаан улхуруш, ич шагьрин мектебарин 44 выпускникди му дарснаан имтигьян тувну. Кьялан гьисабариинди, дурарихьан му ЕГЭ 47 баллиз тувуз гъабхьну. Яна, кьялан гьисабниинди, балларин кьадар сачтIан 16 баллин артухъди ву. Хъа имтигьян туву 44 касдикан сари ЕГЭ 80-тIан артухъ баллариз тувну, 13-рихьан лазим вуйи кьадар баллар гъадагъуз гъабхьундар.
Дагъу. Огни шагьрин мектебариъ урхурайидарин аьгъюваларин дережа 62 выпускникди ЕГЭ 80-тIан зиина баллариз тувували ашкар апIура. Сач гьамцдар натижйириинди анжагъ 40 выпустникдихьантIан ЕГЭ тувуз гъабхьундайи. Цци 20 касди ЕГЭ 90-тIан артухъ баллариз тувну. Хъа сач 7 выпускникдихьантIан 90-тIан зиина баллар гъадагъуз гъабхьундайи»,

— къайд гъапIну Максим Аьлихановди.

Мидланра гъайри, Дагъ. Огни шагьрин образованиейин управлениейин начальникди туву мялуматаринди, цци, сабпи ражари вуди, шагьрин мектебарин 30 выпускникдиз, урхбаъ хъуркьувалар улупбаз ва ЕГЭ заан натижйириинди тувбаз лигну, вари хьубар айи аттестатар ва «гъизилин медалар тувну.