Урусатдиъ коронавирусдиан суткайиъ гъийихдарин варитIан аьхю кьадар ашкар дапIна. Оперштабдин мялуматариинди, 15-пи июлиъ учIру уьзриан 791 кас гъийихну. ТIягъюн ккебгъхъанмина Урусатдиъ вари гъийихдарин кьадар 146 069 кас ву.

 

Аьхиримжи суткайиъ уьлкейиъ коронавирус кубчIвбан 25 293 дюшюш ашкар дапIна. Уьзур кубчIвбан варитIан гизаф дюшюшар Москвайиъ – 5237, Москвайин областдиъ – 2444, Санкт-Петербургдиъ – 1954 ву.

Дагъустандиъра коронавирусдиан кетIерццнайидарин кьадар артухъ шула. Больницйириъ ккаърайидарин арайиъ гъагъиди уьзур кубчIвнайи бицIидар ва жигьиларра а.

Ихь республикайиъ коронавирус кубчIвбан 38 507 дюшюш къайд дапIна. Аьхиримжи суткайиъ – 198 кас. Уьзур кубчIвну, гъийихдарин уьмуми кьадарра бицIиб дар – 1600 кас.

Дагъустандиъ маскйир алахьбан ва рубар йивну адру 65 йистIан артухъ яш дубхьнайи агьалйир хулариъ гъузбан къайда давам шула.