РД-йин образованиейинна илимдин министерствойин пресс-гъуллугънаан мялумат тувганси, гъябгъюрайи йисан Дагъустандиъ бицIидарин 60 багъ тикмиш апIуз планламиш дапIна. Миди багахь гележегдиъ мектебдиз улихьна вуйи образованиейин циркил яркьу апIуз мумкинвал тувди. Тикилишчивалин ляхнар «Демография» милли проектдин ва республикайин инвестицйирин программайин дахилнаъди гъахура. Думу дараматар дивбаз федералин ва республикайин бюджетариан 8,2 миллиард манат харж хьибди.

 

 

«Республикайиъ мектебдиз улихьна вуйи идарйириъ йишвар гьуркIри адрувалин учIру месэла аьхиримжи йисари бабкан шулайи бицIидарин кьадар артухъ гъабхьивалихъди аьлакьалу ву. 2017-пи йислан башламиш дапIну, мектебариз гъюрайи бицIидарин кьадар 13 агъзуриина артухъ гъабхьну. Мидланра гъайри, республикайин шагьрариз дагълу гъулариан кюч шулайи хизанарра артухъ духьна. ИкибаштIан, думу хизанарин бицIидарра шагьрарин мектебариз ва бицIидарин багъариз гъягъиди. Гьаддиз нубатарин сиягь кам шуладар»,

– гъапнийи пресс-гъуллугънаан.

Министерствойиан туву мялуматариинди, цIийиди тикмиш апIурайи бицIидарин багъар шубуд йисандин арайиъ яваш-явашди ляхник кирчди. Дурариъ 9 агъзуртIан артухъ бицIидариз йишвар улупна. Гъийин йигъан республикайиъ бицIидарин багъдиз гъягъюз электрондин нубатнахъ бабкан духьну кьюб вазлиан шубуд йис хьайиз вуйи 2 агъзурихьна бицIидар ва шубуд йислан ургуд йис дубхьнайи 13 агъзур бицIидар дийигъна.

БицIидарин багъдиз нубатнахъ хъайидарин месэла гьял апIури, республикайин образованиейинна илимдин министерствойи аьлава уьлчмйирин комплексный план тартиб дапIна. ЦIийи тикилишар дивбалан гъайри, улихьна йисари мектебдиз улихьна вуйи образованиейин идарйир ади гъахьи йирси дараматар къайдайиз хура, государствойин дару багъариз кюмек тувра.