Республикайиъ ковиддихъди аьлакьалу аьгьвалат айибтIан гъагъи шула – гьар суткайиъ аьзарлу шулайидарин кьадар 200 касдиина за шула, улихьнаси дарди, аьхиримжи вахтна иццурайидарин арайиъ яшлу касарси, жигьиларра бицIидарра аьзарлу шулайивалин дюшюшар алахьура. Му уьзриан кечмиш шулайидарин кьадарра артухъ гъабхьну.

 

Коронавирусдиан аьзарлу гъахьи касари, дидихъди женг гъабхурайи духтрари дагъустанлуйириз дюзди фикир апIуб теклиф дивра.
Каспийск шагьрин поликлиникайин участокдин медсестра Фатима Зугьрабова цIиб улихьнаси коронавирусдиан иццру гъахьнийи. Дугъан фикриинди, жюрбежюр гъуллугъариъ айи ватандашариз, гьадму гьисабнаан духтраризра, вакцина чарасуз лазим ву.

«Гъи шагьрариъ ва районариъ дагъустанлуйир, тIягъвникан затра фикир кадарди, саб жюрейииндира хатIасузвал дюрюбхри, маскйир алдарди лицура, хяларди ва сумчрариз гъягъюра. Мици дубхьну ккундар. Гьар йигъан республикайин шагьрарин ва районарин больницйир коронавирусдиан тазади аьзарлу шулайидари ацIра. Вари сагъ шуладар. Ковид рябкъюри-рябкъюри цIийи жюрейиз илтIибкIура. Гьаддиз шлубкьан ухди ва варидари вакцинация дапIну ккунду. Узура бицIи вахтналан прививка апIурза. Улихьнаси, узура му вирусдиан гъагъиди иццру духьну, шубуб гьяфтайи больницайиъ гъахьунза. Гьамусяаьт анализари йиз ифдик му уьзриз аькси гизаф кьадар антитела кайивал улупну. Гъи йиз хизандиъ саки варидари прививка дапIна: жилири, адашди, дадайи, кьюрид шубари ва дурарин жилари. Узура, иншаллагь, багарихьди привика апIбанди вуза.

ГучIурайидариз ва фикрарикк ккахънайидариз пуз ккундузуз: ав, прививкайин къяляхъра уьзур кубчIвуз мумкин ву. Амма дид’ан инсан кечмиш шулдар. Вари дюн’яйиъ му уьзриан фукьан инсанар кечмиш гъахьнуш, фикир тувай, уьзур ачмиш дубхьну амиди, республика фициб гьялназ гъафнийиш, кIваин апIинай, уьлкейин аьхю шагьрар хъяркью вахт гьархунчвуз!? Уьлкейин йицIбариинди регионариъ саб гъат агьалйириз чарасуз прививка дапIну ккунивалин къарар кьабул дапIна, фицики му уьзур лап хявиб ву, ва аьзарлуйирин кьадарну гучI тувра.

Жвуван ва багахьлуйирин сагъ’вал уьбхбан бадали, анжагъ саб рякътIан адар – прививка апIувал. Жин апIударза, прививка тазади арайиз дуфну амиди духтраризра, медсестрйиризра думу йивуз гучIури гъабхьнийи. Сари-сарихьан насигьят гъадабгъури гъахьну. Гьадмуган вакцина гъапIдар сарра аьзарлу гъахьундар. Дурарин ифдиъ антитела арайиз гъафну. Думу прививкайи духтрар «уьру зонайиъ» лихуз ва аьзарлу дархьуз кьувват тувра.

Гъи республикайиъ социалин дистанция уьбхювал, маскйир алди лицувал ккун апIура. Багахь йигъари думу тIалабар пчIу апIидар. Дурар уьзур яваш апIбан бадали чарасуз лазим ву. Ав, вакцинайин кьяляхъ уьзрин бязи лишнар арайиз гъюб мумкин ву. Гьадму гьисабнаан, температура за, кIул иццру шулу, руб гъиву йишв сацIиб аьбгъюру. Аьзарлу духьну, реанимацияйиъ айидарин гьялнахь тевиган, мурар гьисабназра гъадагъуб дюз дар»,

– аьлава гъапIну Фатима Зугьрабовайи.

Учу дугъан фикрихъди рази вуча.