Август вазлихъан хъюгъну, Урусатдин Федерацияйин аьтрафариин саб жерге цIийи къанунар гьяракатнаъ учIвра: ОСАГО – хусуси машинар хъаъбан жавабдарвалин страхование апIбан цIийи рягьят къайдйирихъди аьлакьалу, фитнесдихъан туву пулин саб кьадар агьалйирин гъазанжарикан гьюкуматди ктабгъу налогарилан кьяляхъ апIбан, «кьюбпи ярхла востокдин гектарин» гьякьнаан ва жарадар. 

 

 

Спортдин машгъул хьувализ харж гъапIу пулин 13% йисандин арайиъ гъазанмиш гъапIу гъазанжарикан ктабгъу налогарилан кьяляхъ апIуз хъюгъди, амма кьяляхъ апIру пулин кьадар, яшайишдин имбу игьтияжариз йискьубан арайиъ харж гъапIу пулра кади, 120 агъзуртIан артухъ дубхьну ккундар. Думу пул 2022-пи йисан 1-пи январихъан, гьарурихьан чахъандиси, бицIидарихъандира гъадабгъуз хьибди.

КIваин апIурача, яшайишдин метлебариз (сагъламвал мюгькам апIуз, аьгъювалар гъадагъуз, рягьимлувалин харжариз, страхованиейин вари жюрйириз, хал-жил гъадабгъуз, ва гьацира дилаварчйирин ляхниъ) харж гъапIу пулин тяйин дапIнайи кьадар (13%) йискьубан арайиъ гъазанжарикан ктабгъу налогарилан кьяляхъ апIуз шулу. Дидиз социальный вычет кIуру.

Улихьна йигъари ЛДПР-ин фракцияйин депутатари Госдумайиз социальный вычетдин кьадар 120 агъзурилан 360 агъзуриина за апIбан теклиф хьади удучIвну, фицики дидин кьадар аьхиримжи йицIуд йисан зат дигиш дархьиди ими, хъа гьаму вахтнан арайиъ уьлкейиъ вузариъ урхбан кьимат 3 ражари за, урусатдин пулин кьимат 3 ражари ис гъахьну, агьалйири гъадагъурайи гъазанжарра йислан-йисаз цIиб шула. Кудухнайи далилари, ЛДПР-ин вакиларин фикриинди, налогарин вычетдин кьадар чарасуз за дапIну ккуниваликан кIура. ГъитIибккнайи месэла 3-пи августди Госдумайин заседаниейиъ гьял апIуз адабгъну.