Хьадан мани йигъар аьхирихъна гъюри, бицIидар мектебдиз гьязур апIру вахтра улубкьура.
Уьлкейин президент Владимир Путинди Федералин Собраниейиз вуйи чан Посланиейиъ мектебдиз гъягъру бицIидариз кюмек вуди пул тувбакан гъапнийи. Думу гафар гьавайиди гъузундар: гьаму йисан июлин 2-пи йигъан президентди бицIидар айи хизанариз 10 агъзур манат тувбан гьякьнаан указдиин къул гъизигну. Думу пулиз президентди вахт ккимиди гъапиганси, «мектебдиз гъягъру бицIидариз вуйи пул» ччвур тувнайи.
Фуну бицIидариз думу пул тувра?
Пул 6 йислан 18 йис’ина яшар вуйидариз – 2021-пи йисан сентябрин 1-пи йигъаз 6 йис дубхьнайидарилан гъадабгъну, 2021-пи йисан 2-пи июлтIан ухди дарди 18 йис гъабхьидариз тувра. Яна бицIир 2003-пи йисан 3-пи июлин ва 2015-пи йисан 1-пи сентябрин арайиъ айи вахтнаъ бабкан духьнайир, бицIир ва дугъан абйир-бабар Урусатдин ватандашар вуди ккунду.
Эгер бицIир инвалид, сагъламвалин читинвалар кайир вуш, пул ккун апIури илтIикIру вахтназ мектебдиъ урхури имиш, 18 йислан 23 йис тамам хьайиз вуйидаризра пул тувру.
Гьадму пул адабгъбан бадали, 2021-пи йисан июлин 15-пи йигълан 1-пи ноябрь улубкьайиз аьрза дибикIну ккунду. Аьрза «Госуслуги» порталиантинара тувуз шулу, Пенсияйин фонднаъра аьрза кьабул апIуру. Улихьна айи аьрзйириинди пул тувидар. Указдиъ ачухъди дибикIна – пул аьрза тувбан кьяляхъ гъюру. Йирхьур йис дубхьнашра, мектебдиз душну адаршра, бицIириз пул тувру. Абйир-бабарихьан гъюру йисаз вушра чпин бицIириз мектебдин алатар гъадагъуз шулу. Думу жюре пул гьар йисан тувуз сарира гаф тувнадар.
Эгер бицIирин 16 йис дубхьнади, мектебдиъ имдарди, колледждиъ урхурашра, абйир-бабарихьан 10 агъзур манат адабгъуз шулу.
Туврайи пул бицIирин яшарикан асиллу ву, хизандиз гъюрайи гъазанждикан асиллу дар. Абйир-бабарихьан пул, бицIидар мектебдиз гьязур апIбазси, жара гъайгъушнаризра харж апIуз шулу. Дидин гьякь-гьисаб сарира гъабхурадар.
Учу мектебдиз гъягъру бицIидариз вуйи пул адабгъу дадйирихъди сюгьбатар гъухунча.
Нурият, 2 бицIирин дада:
– Узу бицIидариз мектебдиз лазим шлу алатариз вуйи пул адабгъунза. Йиз аьхюну бай 6-пи, хъа бицIину бай 3-пи классдиз гъягъюра. Уьлкейин Президентди туву пуликан гизаф шад вуза, фицики баяр-шубар мектебдиз гьязур апIруган, гизаф пул харж шулу. Думу пул адабгъубси, узу баяриз мектебдиз гъягъруган алахьру ккуртар, физкультурайин дарсариъ алахьуз спортдин палат гъадабгъунза. Гьаму кьадар пул гьубкIруси харж дапIназа.
Джамиля, 3 веледдин дада:
– Учу хизандиъ шубур велед тербияламиш апIурача. Аьхюну риш (дугъан 16 йис ву) гьаму йисан медицинайин колледждик урхуз кучIвну. Имбуну бицIидар мектебдин 3-пи ва 6-пи классариъ урхура. Ич хизандиъ айи бицIидариз сатIиди 30 агъзур манат гъафну. Гьадму пул гъювалиинди аьхю кюмек гьисс гъапIунча. Баяр-шубариз палтар, ликариин алахьрудар, тетрадар, ручкйир ва гьацдар жара шей’ар гъадагъбанди вуза. БицIидариз кьюрдну алахьру палтариз хъана гизаф пул лазим шулу, гьаддиз айи кьадар вари пул гьамусяаьт харж апIбанди дарза.
