Хьадан тятIиларин ва рягьятвал гъадабгъру вахт аьхирихъна гъюра. Дагъустандин бицIидари рягьятвал гъадабгъру ва сагъламвал мюгькам апIру лагерариъ шубубпи смена ккебгъна. Гьамусяаьт республикайин аьтрафариин али 20 лагериъ 2198 бицIири рягьятвал гъадабгъура. Лагерариъ чпин тай баяр-шубарихъди гъапIу жюрбежюр тамшир ва кIули гъуху конкурсар, шаду вожатйир ва цIийи дустар, республикайин Главайихъди ва заан гъуллугъариъ айи гьякимарихъди гъахьи гюрюшар – гьаму ва жара гьядисйир бицIидарин кIваъ гьаммишандиз гъузди.
БицIидарин сагъламвал мюгькам апIру бязи лагерариъ шубубпи смена фици гъябгъюраш, гьаму макьалайиъ жикъиди ктибтидича.
Меликовдихъди сюгьбат
Гьаму йигъари РД-йин Глава Сергей Меликов вахтназ вуди РД-йин образованиейинна илимдин министрин вазифйир тамам апIурайи Ягь’я Бучаевдихъди, «Саб вуйи Урусат» партияйин региондин отделениейин секретарин заместитель Елена Ельниковайихъди, РД-йин вице-премьер Мурад Къазиевдихъди ва жара гьякимарихъди Избербашдиъ ерлешмиш дубхьнайи республикайин бицIидарин сагъламвал мюгькам апIбанна образованиейин «Солнечный берег» центриз гъафну. Центриъ рягьятвал гъадабгъурайи бицIидарихъди гюрюшмиш хьпан кьяляхъ, региондин Глава лагерин яшайишдин шартIариз лигуз гъушну.
Сергей Меликовдин гафариинди, багахь гележегдиъ лагерин шартIар мюгькам къайдайиз хуз планламиш дапIна.
Дагъустандин кIулиъ айир лагериъ рягьятвал гъадабгъурайи баяр-шубарихъди гюрюшмиш гъахьну. Сергей Меликовдихъди вуйи сюгьбатнаъ бицIидари лагериъ спортдиин машгъул хьуз цIибтIан йишв адруваликан аьрза гъапIнийи.
«Дагъустандин шагьрариъси, районариъра спортдин хайлин цIийи майднар гьуркIрадар. Дурар арццбан бадали, учу вари чарйир агурача. Мидланра гъайри, му месэла гьял апIуз республикайиз федералин центрианра кюмек тувра. Му лагериъра спортдин майдан абццдихьа», ‒ жаваб тувнийи Сергей Меликовди.
Къайд дапIну ккундуки, «Солнечный берег» лагерин аьтрафариин, Сочийин образованиейин «Сириус» центриз ухшарвал ади, РД-йин зигьимлу бицIидар агру ва дурариз кюмек тувру деврин центр тикмиш апIуз пландик кипна. Ягь’я Бучаевдин гафариинди, думу центр тикмиш апIбан ляхнар 2022-пи йисан ккергъди.
«Юнармия» ва «Планета» сабхилди лихура
Армияйиз гьязур апIбанна спортдин «Планета» лагерин администрацияйи Дагъустан Республикайин «Юнармия» жямяаьтлугъ тешкилатдихъди сатIиди ляхин гъабхура. Дурарин ляхин жигьиларин арайиъ дявдинна ватанпервервалин тербия мюгькам апIбаз диш дапIнайиб ву. Шубубпи сменайиз лагерин вожатйири Юнармияйин вакиларихъди сатIиди бицIидарин арайиъ спортдин тамшир, яратмиш апIбан конкурсар, гъарзарик кучIвбан дарсар, воркаут майдандиин кьувват мюгькам апIру тренировкйир, гаркIал гатIабхьбан, автомат дюзди уч апIбан дарсар, гьацира теннисдиан, пляждин футболиан ва волейболиан талитар тешкил гъапIну.
«Космос» наркотикариз аькси ву
Аьгъювалар гъадагъбанна тренировкйир гъахбан «Космос» лагери бицIидарин шубубпи сменайиз маракьлу программа гьязур гъапIну. Смена ккебгъу сабпи йигълан мина бицIидар жюрбежюр талитариъ ва конкурсдин программйириъ иштирак шула. Гьаму йигъари лагериъ «Учу сагъу уьмур хъапIбахъанди вуча» темайиан сюгьбатарихъ хъпехъну. Хайлин бицIидари профилактикайин серенжемариз «Наркотикариз аькси вуча» темайиан шиклар гъизигну. Сюгьбатариъ дурари наркотикари ва алкоголи инсаниятдиз туврайи аьхю зарарнакан мялуматар гъадагъну.
«Парусдин» фестиваль
Сагъламвал мюгькам апIбан «Парус» лагериъ бицIидари кIваълан дурушру йигъар гьаъну, аьгъювалар ва мянфяаьтлу тербия гъадагъну. Хьадан вахтна гьарсаб сменайиз лагериъ мастер-классар, конкурсар, жюрбежюр талитар гьязур дапIнайи. Аьхиримжи йигъари лагерин вожатйири бицIидарихъди пряникариин, гъванариин, гъумриин, асфальтдиин шиклар зигбаан фестиваль гъубхну. Лагериъ «ВаритIан ужур», «Саб-сабдиз ухшарвал айи», «ХатIасуз чарх» ва жара конкурсар, серенжемар ва тамшир кIули гъухну.
Лагерарин йигъар аьхирихъна гъюра, ва гъюру йисан республикайин рягьятвал гъадабгъру ва сагъламвал мюгькам апIру лагерари бицIидар хъана артухъ рази ва шад апIур кIури, миж кивдихьа.
