18-пи августдиъ вахтназ вуди РД-йин Главайин вазифйир тамам апIурайи Сергей Меликовдин регьберваликкди региондин сатIи вуйи бюджетдиз налогар тувувал бегьемди тямин апIбан месэлйир гьял гъапIну.
Манзилнаъди видеоконференцияси кIули гъубшу серенжемдиъ Урусатдин ФНС-дин кIулиъ айирин заместиель Дмитрий Сатин, региондин къанун уьбхру ва ахтармишар гъахру органарин вакилар, РД-йин правительствойин финансарин цирклин гъуллугъчйир иштирак гъахьнийи.
Уч духьнайидарихьна илтIикIну, Сергей Меликовди республикайин бюджет гизаф дотацйир гъюрайиб вуди гъубзрайивал кIваин гъапIну.
«2021-пи йисан 1-пи июлиз вуйи улупбариинди, Урусатдин Федерацияйин консолидированный бюджетдиз буржлу вуйи кьадарнан 25% физический касарин хусусиятналан вуйи налогари (6,8 миллиард манат) тяйин апIура, гьадму гьисабнаан Дагъустан Республикайин консолидированный бюджетдиз тувну ккуни 6,5 миллиард манат, ясана 53,2% буржлу вуди гъузра», – къайд гъапIну региондин Главайи.
Физический касарин тувну адру транспортдин налогди 6,6 миллиард манат, физический касари жилилан тувру налогди – 1,2 миллиард манат, физический касарин хусусиятниин илипнайи налогди – 700 миллион манат тяйин апIура. Налогарин органари, буржлу вуйи пул цIиб апIбан бадали, сударин приставарихъди, ГИБДД-йин гъуллугъчйирихъди, мировой судйирихъди сатIиди гизаф ляхин дубхна. «Амма, буржлу вуйи пулин кьадар цIиб хьувализ дилигди, 2021-пи йисан дапIнайи ляхин харжиб вуди гьисаб апIураза», – гъапну Сергей Меликовди.
Федералин налогарин гъуллугънан РД-йиъ айи Управлениейин кIулиъ айи Гъазинур Апсалямовди консолидированный бюджетдиз гъюрайи налогар артухъ апIбан ляхникан ктибтну. Дугъу къайд гъапIганси, гьаму йисан июлин 1-пи йигъаз республикайин консолидированный бюджетдиз дуфну ккуни уьмуми буржарин кьадар 12,2 миллиард ву. Гьаму йис ккебгъхъан мина буржар тувувал 639 миллион манатдиинди (5,6%) за гъабхьну.
«Налогарин органари гьаму йисан сабпи 6 вазли налогар тувуз мажбур апIбан уьлчмйир кьабул апIбан натижайиъ РФ-дин бюджетдин гъурулушдиз 2,2 миллиард манат гъубшну», – къайд гъапIну Гъазинур Апсалямовди.
Дугъу, кьабул дапIнайи уьлчмйирикан улхури, къайд гъапIганси, 1,4 миллиард манат налогар тувувал тIалаб апIури, физический касариз 438 агъзур кагъаз хътаъну; суддин органариз 70 агъзур аьрза тувну. Мидланра савайи, налогарин органди физический касарин пул дивнайи банкариз, 44 миллион манатдин налогар ктагъувал ккун апIури, кагъзар хътаъну. Гъубху ляхни 760 миллион манатдин буржар цIиб апIуз мумкинвал тувну.
