РД-йин сагъламвал уьбхбан министр Татьяна Беляевайин гафариинди, республикайиъ коронавирусдиан аьзарлу духьнайидарин кьадар цIиб шула. Амма думу уьзриан йихурайидарин кьадар аьхюб вуди гъубзра. Республикайин больницйирин реанимацияйин отделенйириъ коронавирусдиан гъагъиди иццурайидар гизаф а.
Гьацира министри къайд гъапIганси, августдин 25-пи йигъаз вуйи улупбариинди, республикайин медицинайин тешкилатариъ 5835 аьзарлуйиз дахъру йишвар гьязур дапIна, хъа шубубпи ражари алжабгъу уьзрин лепейин вахтна 6,5 агъзур йишв гьязур дапIнайи.
Татьяна Беляевайи республикайиъ вакцинайин рубар йивувалин ляхин гьяракатнаъ айиваликанра гъапнийи. Гьамусяаьт республикайиъ коронавирусдиз аькси рубар 354547 касдиз дивна, думу кьадарнакан 252878 касди вакцинайин кьюбиб рубарра, 101669 касдиз сабпи руб гъивну.
Урусатдин сагъламвал уьбхбан министерствойи вакцинацияйин гьякьнаан мялуматар цIийи алаъну. Улихьди коронавирусдиан аьзарлу гъахьи, гьацI йис улихьна вакцинайин руб гъиву, чпин яш 60 йистIан артухъ дубхьнайи ватандашариз «Спутник Лайт» йивуз ихтияр тувна. ВИЧ ва онкологияйин уьзрар кайидариз «Спутник-V» вакцинайин рубар йивувалин важиблуваликан дупна. Вакцинайин руб духтри ахтармишар гъахбан кьяляхъ йивуру, руб йивбан кьяляхъ гьацI сяаьтна прививка апIру пунктнаъ дусну гъузру.