Уьл убжру сурсатарин кьимат за хьувализ дилигди, аьхиримжи миржид йисандин арайиъ республикайиъ уьлин кьимат асас вуди дигиш дубхьнадайи. Дагъустандиъ убжурайи уьл гизаф ицциб вушра, жара регионариъ айи кьиматарихь тевиган, дидин кьимат асккануб вуди гъубзра.

 

Амма, улихьна йигъари уьл масу гъадабгъуз тукандиъ учIвиган, гъяркъю кьиматари узу цIибди мюгьтал гъапIнийи.
Гъубшу гьяфтайин аьхириъ РД-йин гъулан мяишатдин ва ипIру-убхъру сурсатарин министрин заместитель Эмин Шайхгьясановдин, РД-йин промышленностдин ва алвер апIбан министрин заместитель Рашид Мурзаевдин, республикайиъ уьл гьясил апIурайи чIатху карханйирин вакиларин иштирак’валиинди совещание кIули гъубшнийи. Дурари яшайишдин касибвал кайи ватандашари асас вуди ишлетмиш апIурайиб уьл вуйивалин гъавриъ духьну ккуниваликан гъапнийи. Гьаддиз кми-кмиди жвуми йигъан уьл пулсузди пай апIбан акцийир гъахувал давам апIура. Гьадму жюрейин акцйир республикайин алвер апIру карханйирира гъахури шулу.

Къайд апIуб лазим вуки, гьаму йисан кьиматар за хьуз хъюгъю йиккун, ччимдин, муртйирин кьиматар къайдайиз гъафну. Дагъустандин гъулан мяишатдин министерствойи, кьиматар за дархьбан бадали, айи мумкинвалар вари ишлетмиш апIура – ярмаркйир гъахура, тялукь шартIар тешкил дапIну адру йишвариъ гъулан мяишатдин яр-йимиш масу тувуз ихтияр тувра. Мидланра савайи, гъулан мяишатдин сурсат гьясил апIрудариз гьюкуматдин терефнаан жюрбежюр кюмекар апIура.