2021-пи йисан Дагъустан Республикайиъ 200 агъзур тоннатIан артухъ тIумтIин бегьер уч апIбанди ву. Гьадму кьадарнакан 150 агъзур тоннайиинакьан тартиб апIбанди ву. Дидин гьякьнаан республикайин гъулан мяишатдин ва ипIру-убхъру сурсатарин министерствойин кIулиъ айирин заместитель Шарип Шариповди мялум гъапIну.
Дугъан гафариинди, тIумтIарин бегьернан аьхюну пай республикайин заводариъ тартиб апIуру, хъа жара регионариъра ихь республикайин яр-йимишдиз муштарйир а. Ригъдин мейва вахтниинди жара регионариз гъабхувал важиблу ву.
«КIваина хураза, гьаму йисан республикайиъ тIумутIчивалин ва чяхир гьясил апIбан гьякьнаан къанун кьабул дапIна. Душваъ Дагъустандиз гизаф мяналу, агьалйир ляхнихъди тямин, хъа налогарин бина артухъ апIбан, думу цирклиз гьюкуматдин терефнаан кюмек тувувалин уьлчмйирикан ва терефарикан дибикIна. Федералин къанундиъ дигиш’валар тIаъбахъди аьлакьалу вуди, Дагъустандин тIумутIчивалихьна маракьлувал за дубхьна.
РД-йин гъулан мяишатдин ва ипIру убхъру сурсатарин министерствойи, цирклин асас кьувват вуйи – тIумтIар гьясил апIру карханйири чпин мяишатарин экономика за апIуз мумкинвал тувур кIури, умуд кивра. Учу тIумтIар гьясил апIрударикан агротехникайин тIалабар тамам апIувал, ужуб бегьер гъадабгъуз кюмек тувру деврин гьясиллувалин тажруба ишлетмиш апIувал ккун апIурача», – гъапну Шарип Шариповди.
Министрин заместитель, тIумтIар уч апувалин ляхин фици кIули гъябгъюраш аьгъю апIбан бадали, Гъяякент райондин «Утамышский» ГУП-диз гъушну.
Гьамусяаьт Гъяякент район тIумтIин багъларин кьадарнан гьисабнаан Дагъустандиъ кьюбпи йишв’ин ал. Душваъ саки 3,9 агъзур гектар багълариъ тIумтIар кивна, 3300 гектариъ айи багълари бегьер тувра. Гъулан мяишатдин 30 тешкилат, КФХ, ИП тIумтIар гьясил апIбиин машгъул ву. Мидланра савайи, кюмекнан хусуси мяишатари, 860 гектариъ тIумтIин багълар кивну, бегьер гъадабгъура.
