Сентябрилан башламиш дапIну, мектебдиъ урхурайидариз ва студентариз пулсузди музеяриз ва театрариз гъягъюз мумкинвал шулу, гьаз гъапиш «Пушкиндин карта» ччвур тувнайи аьхю цIийи проект гьяракатнаъ убчIвра.
«Пушкиндин карта» – жигьиларин жвуван культура-йихьна иштагь артухъ апIбаз диш дапIнайи гьюкуматдин программа ву. Дидихъ музеяриз ва театрариз гъягъюз пулсузди вуйи билетар гъадагъуз шулу. Карта 14 йис тамам гъабхьи жигьиларихьан, паспорт гъадабгъубси, «Госуслуги» порталиъ регистрация дапIну, ясана, паспортна СНИЛС хьади душну, почтайиъ гъадабгъуз шулу. Эйсийин яш 23 йис тамам хьайизкьан, «Пушкиндин картайикан» мянфяаьт ктабгъуз шулу. Думу Почта Банкди адабгънайи виртуальный карта ву. 2021-пи йисан дидихъ бюджетдиан 3000 манат хъивди, ва думу пул, йисандин арайиъ музеяриз ва театрариз гъягъюри, харж апIуз хьибди. Хъа 2022-пи йисан гьюкуматди картайихъ 5 агъзур манат хъивди. Гьаци – гьар йисан. Цци дидин кьадар цIиб вуйивал проект йисандин эвелианмина гьяракатнаъ адрувалихъди аьлакьалу ву.
Эгер картайин эйсийихьан йисандин арайиъ вари пул харж апIуз дархьиш, хъайисан дидкан мянфяаьт ктабгъуз шулдар. Картайихъ фукьан пул хъимиш, «Госуслуги.Культура» приложенияйиъ, «Счет» кIуру пунктнаъ аьгъю апIуз шулу.
«Пушкиндин картайин» эйсийихьан театриз, музейиз, филармонияйиз, консерваторияйиз гъягъюз шулу, хъа циркназ ва кинойиз гъягъюз ваъ.
Экспертари улихь ккимиди ахтармиш дапIну, культурайин программа тербияйин ва ватанпервервалин мянайинуб вуштIан, билет гъадабгъуз хьибдар.
Проектдиъ 1000-рихьна серенжемар гъахуз ккайи 1500-тIан артухъ культурайин идарйири иштирак’вал апIиди. «Пушкиндин картайихъди» гъягъюз шлу спектакларин, выставкйирин ва концертарин сиягьнахъди, «Госуслуги» порталиъ таниш хьуз шулу. Билетар «Госуслуги.Культура» приложениейиъ, культурайин идарйирин сайтдиъ ва кассайиъ гъадагъуз шулу. Дидин кьимат 3 агъзуртIан артухъ дубхьну ккундар ва думу пул жара метлебариз харж апIузра шулдар.
Къайд апIуб лазим вуки, «Пушкиндин карта» ишлетмиш апIури, неинки жвуван региондиъ, хъа гьацира уьлкейин вари пIипIариъ культурайин серенжемариз гъягъюз шулу. Мисалназ, Аьхю вая Мариинский театраризра. Мидланра савайи, картайихъ гъадабгъу билет кьяляхъра тувуз шулу.
Карта гьарсар касдихьан чан хушниинди гъадабгъуз шулу. Думу сад йисазди тувру, гьар йисан цIийи алапIуру. Картайихъ кечирмиш шулайи йисан гьюру йисазра билетар гъадагъуз шулу.
Гьамусяаьт Урусатдиъ картайикан 13 миллион жигьиларихьан мянфяаьт ктабгъуз шулу. Гъийин йигъаз программайиъ 85 региондин культурайин 1354 идара иштирак шула.
