Дербент райондин Аьраблинское гъулан кьялан мектебдиъ, табасаран чIалнан дарсар киври, гизаф йисари Зюгьреханум Рамазанова лихура. Чан намуслу зегьметниинди ва ляхнихьна айи ккунивалиинди дугъу неинки мялимарин ва урхурайидарин коллективдин арайиъ, хъа гьацира гъулан жямяаьтдин арайиъра аьхю гьюрмат гъазанмиш дапIна.
Зюгьреханум Агъакеримовна жавабдарвалиинди жюрбежюр гъуллугъариъ гъилиху лайикьлу кас ву. Хайлин йисари думу гъулан сельсоветдин главади гъилихну, гьацира дугъу бицIидарин багъдиъра ляхин гъапIну. Саб гафниинди, вари терефарихъанди ляхнин ва яшайишдин тажруба айи кас ву.
Узу аьгъюваларин Йигъан дугъахъди гюрюшмиш гъахьунза ва думу урхбан цIийи йисахъди мубарак гъапIунза. Гьюрматлу касдикан узу гъи уьлкейиъ образованиейин цирклиъ арайиз дуфнайи аьгьвалатнакан чан фикрар ачухъ апIуб ккун гъапIунза.
– БицIидар – ихь гележег, ихь уьмур, культура, тарих давам апIру насил ву. Дурар тербияламиш апIбаз ихь гьюкуматди гьар йигъан фикир тувра. Мялимариз, мектебариз артухъ фикир туври адар пувал кучIал ву. Ухьуз варидариз мялум вуйиганси, 1990-пи йис СССР-ин гьюкуматдиз варитIан читин вахт гъабхьну. Гьюкуматдин къанурар дигиш гъахьну, саки вари гъибикьну. Думу вахтари, мялимарси, жара гъуллугъариъ лихурайи пишек-рарра цIийи къанунарихъди таниш хьайиз, читинвалар алахьнийи. Магьа гизаф йисар гъушну, ва гъи ихь инсанарин гележег фукьан вушра ужуди ву. 1997-пи йисхъан мина мектебариъ дарсар киврайи мялимариз, 25-йисан мялимвалин зегьмет зигбаз лигну, лайикьлу пенсия тяйин гъапIну. Гьамура аьхю кюмек гъабхьну.
Ав, гъи 50-60 йис мидиз улихьна диву мектебар, бицIидарин багъар вари цIийи алаура, цIийидар тикмиш апIура. Урусатдин Президент Владимир Путинди асас вуди ихь Дагъустан Республикайин терефназди аьхю фикир тувра. Гъубшу йисан мектебдиъ классдин идара апIурайи мялимариз, Владимир Путинди гъапиганси, 5 агъзур манат тувуз хъюгъну, ва гьацира цци, 2021-пи йисан, вари мялимарин маважибдиин шубуд агъзур манат иливну.
– Гъи, 1-пи сентябриъ, Аьраблинка гъулаъ «Золушка» кIуру бицIи-дарин багъ ачмиш гъапIну. Гьаддиканра кьюб гаф пуб ккун апIураза.
– Гьамусяаьт апIурайи ляхнари ихь Ватандин гележегдин насил тербияламиш апIбаз аьхю фикир туврайиваликан кIура. Гъийин девриъ гьарсаб ляхин апIуз фукьан вушра мумкинвалар а. Мисалназ, гъи Аьраблинка гъулан жямяаьтлугъдиз бицIидарин багъ ачмиш апIувал аьхю гъулайвал гъабхьну. Гьелбетда, вари хизанариъ бицIидариз лигру касар адар, хъа читинвал кайи касариз бицIидарин багъ ачмиш апIувал зурба кюмек ву. Гъийин чан улхбариъ Президент Владимир Путинди ухьуз кIурайи гафар гьякьлудар ву, ухьу гележегдин насил тербияламиш апIуз гьаммишан гьязур вухьа.
