Дагъ.Огни шагьрин 6-пи нумрайин кьялан мектебдиъ цци садпи сентябрь – аьгъюваларин Йигъ – кьюбдри шадвалиинди къайд гъапIнийи. Гьаз гъапиш, душваъ цIийи урхбан йис мектебдин цIийи дарамат ачмиш апIувалиинди ккебгънийи. Мектебдиъ сабпи зенг йивбан серенжемдиз урхурайидар, мялимар, урхурайидарин абйир-бабар, Дагъ. Огни шагьрин администрацияйин гъуллугъчйир ва хялар уч гъахьнийи. Аьгъюваларин Йигъаз бахш дапIнайи линейка 11-пи классдиъ урхурайи Валида Уружевайи ва Айна Гьяжиевайи ачмиш гъапIнийи, хъа шадлугънан серенжемдиъ удучIвну улхуз сабпи гаф мектебдин директор Мирзе Байрамовдиз тувнийи.
Директори чан удучIвну улхбаъ сабпи нубатнаъди уч духьнайидар аьгъюваларин Йигъахъди тебрик ва серенжемдиз дуфнайи хяларихъдира таниш гъапIнийи.
– Гъийин йигъ ухьуз кьюбдри машквар вухьуз, сабпиб – аьгъюваларин машквар, кьюбпибра – ухьуз мектебдин цIийи дарамат ачмиш апIувал. Му ухьлантина ихь насларизра гъубз-райи аьхю уьмарат ву. Ухьуз мициб аьхю пешкеш багъиш гъапIу Дагъ. Огни шагьрин глава Аьлирзаев Жалалудин Исмяиловичдиз ва депутат Аьлиев Сефер Насировичдиз урхурайидарин, мялимарин ва абйир-бабарин терефнаан аьхю чухсагъул мялум апIураза. Ва гьацира му мектеб диву устйиризра аьхю чухсагъул кIурахьа, – къайд гъапIну Мирзе Байрамовди.
Дагъ. Огни шагьрин глава Жалалудин Аьлирзаевди чан улхбаъ Дагъ. Огни шагьрин жямяаьт, мялимар, урхурайидар ва абйир-бабар аьгъюваларин Йигъахъди тебрик гъапIнийи ва баяр-шубарикан дарсариз аьхю фикир тувувал, хъа мялимарикан ва абйир-бабарикан сабур апIувал ккун гъапIнийи.
– Гъи ухьухъди шадвал пай апIуз республикайин энергетикайинна ЖКХ-йин министр Ризван Мурадов ва Урусатдин промышленностдин карханйирин эйсйирин ва дилаварчйирин Союздин Дагъустандин отделениейин кIулиъ айи ихь ватанагьли Сефер Аьлиев дуфна. Му касар, ухьу ва ихь гележег бадали чалишмиш шули, ужудар хиялар, ниятар ади дуфнайидар ву. Ризван Уьсманович, гьаммишан ихь Дагъ. Огни шагьрин тереф уьбхюри, инсанарин тIалабариз лигурайи кас ву. Хъа Сефер Насирович Дагъ. Огни шагьрин депутат ву, – таниш гъапIнийи шагьрин кIулиъ айири уч духьнайидар серенжемдин хяларихъди.
Ризван Мурадовди ва Сефер Аьлиевди чпин удучIвну улхбариъ уч духьнайидар шадлугънан серенжемдихъди тебрик гъапIнийи. Республикайин кIулиъ айидар Дагъ. Огни шагьрин лап читин гьялнаъ айи мектебарин дараматарин ерина цIийидар тикмиш апIуз гъайгъушнаъ айиваликан, ужудар аьгъювалар гъадагъбан бадали, баяр-шубари зегьмет дизигну ккуниваликан ва хайлин жара месэлйирикан гъапнийи. Сефер Аьлиевди чан терефнаан мектебдиз телевизорра багъиш гъапIну.
Шадлугънан серенжемдин аьхириъ Дагъ. Огни шагьрин глава Жалалудин Аьлирзаевди ва шагьрин УО-йин начальник Максим Аьлихановди ва дуфнайи хялари мектебдин цIийи корпус ачмиш апIбан уьру лента гьадабтIнийи.
Му серенжем ккудубкIбалан кьяляхъ, узу мектебдин директор Мирзе Байрамовдикан мектебдин тарихнакан жикъиди саб-кьюб гаф пуб ккун гъапIнийза.
– Му мектеб 1969-пи йисан ачмиш гъапIуб ву. Чан вахтна мектеб 300 урхурайи баяр-шубариз йишвар ади дивуб вуйи. Гъи Дагъ. Огни шагьриъ дуланмиш шулайи инсанарин кьадар артухъ гъабхьну, ва гьаддихъди аьлакьалу вуди гьамусяаьт шагьрин мектебариъ, бицIидарин багъариъ дигиш’валар апIура. Йислан-йисаз мектебдиз гъюрайи бицIидарин кьадар артухъ шула, гьаддиз баяр-шубар кьабул апIру дараматар аьхюди дивну ккунду.
Узу мушваъ 1989-пи йисхъан мина лихураза, кIулиан физика ва математика кивру мялимди, хъа 2007-пи йисхъан мина – директорди. Му цIийи мектеб дивуз хъюгъну, хайлин йисар вуйи. Думу вахтна Дагъ. Огни шагьрин глава Гьялим Исрафилович вуйи. Мектеб дивуз хъюгъну саб бицIи манзил гъубшган, жара глава гъафнийи. Ва гьамци ярхи апIури ва ккудрубкIури, йицIбар йисариинди кьюб сменайиъ лихури, багарихь яшамиш шулайи баяр-шубар мектебдиз кьабул апIуз даршули гъахьунча. Шагьриз цIийи глава Жалалудин Аьлирзаев гъафиган, дугъу ва дугъахъди сабси ихь депутат Сефер Аьлиевди, ич мектебдин аьгьвалатназ фикир тувну, гьяракатниинди му месэла гьял гъапIну.
Гъи му дивнайи мектебдиъ ццийин урхбан йисан 500 баяр-шубари аьгъювалар ва тербия гъадагъиди. Мектебдиъ 32 мялим лихура. Ккергъбан классариъ урхурайидариз мани хураг гьивуз столоваяйин дарамат тикмиш дапIна, тялукь авадлугъарра духна. Му мектеб дивбаъ иштирак гъахьи вари касариз ич коллективдин терефнаан аьхю чухсагъул кIурача, – аьлава гъапIну директори.
