Ихь табасаран халкь – дерин тарих, девлетлу чIал ва хусуси культура айи халкь ву. Ихь ругариин фукьан вушра дявдин женгар гъахьну. Табасаран халкь вари читинвалариан лайикьлуди удубчIвну.

 

Табасаран халкьдин тарих кюгьне вахтарихъан мина  аьраб чIал аьгъю аьхю аьлимари, Ватан уьбхру дирбаш эскрари, жямяаьтлугъ ва политикайин вакилари, ужудар спортсменари девлетлу дапIна. Ихь халкь гьарган чан игит баяриинди машгьур ву. Узу дурарикан Дагъустандиъ варитIан аваза айидарин ччвурар ктухидиза: Зюрдгъярин Гьяжи-Мягьямед, Кьалухъ Мирза, Гурихъ гъул’ан вуйи Зиявудин Юсуф Гьяжи, Халгъарин Наврузбег-Эфенди, Аббас-Кьули Агъа Бакиханов, Темирхан Шалбузов…

Хъа гъи табасаран халкьдин фукьан вакилари ихь Дагъустан машгьур апIура?!

12-пи сентябриъ сяаьт 10-диъ Мягьячгъалайиан Каспийск шагьриз гъябгъру цIийи рякъ’ин ерлешмиш дубхьнайи, Иса Пайгъамбрин ччвурнахъ хъайи Духовный центриъ табасаран халкьдин тарихназ, чIалназ ва культурайиз бахш дапIнайи рюгьнанна эдеблувалин серенжем кIули гъябгъиди. 

Думу серенжемдиъ ихь халкьдин девлетлу культурайин экспонатар дивнайи мурччв албагиди, жюрбежюр хабарсуз пешкешар тувди, бицIидариз конкурсар гъахиди, ужударсдар нашидар урхиди, табасаран халкьдин машгьур вакиларихъди гюрюшар кIули гъягъиди.

Тарихнан, чIалнан аьлимари табасаранарин тарихназ, литературайиз, культурайиз бахш дапIнайи докладар урхиди, мектебариъ урхурайи бицIидари халкьдин уьмриан вуйи сягьнйир улупиди, табасаран шаирарин шиърар урхиди.

Гьюрматлу ватанагьлийир! Ихь халкьдин тарихназ, культурайиз бахш дапIнайи серенжемдиъ иштирак хьуз аьхюдаризра, бицIидаризра теклиф апIурача.