Сентябрин 8-пи йигъан Дагъустандиъ, машгьур шаир Расул Гьямзатовдиз бахш вуди, Вари халкьарин литературайин «Лизи кьарнийирин йигъар» ччвур тувнайи 35-пи фестиваль ачмиш гъапlну.
Аьдат вуйиганси, серенжемар Расул Гьямзатовдин накьвдихъ ва М. Горькийдин ччвурнахъ хъайи, Урус драмтеатрин улихь хьайи шаирин ядигарихъ кюкйир дивбалан ккергънийи.
Серенжемариъ вахтназ вуди РД-йин Главайин вазифйир тамам апIурайи Сергей Меликов, гьюкмин органарин гъуллугъчйир, шаирин яратмишариин юкIв али урусатдин ва харижи уьлкйирин вакилар, багахьлуйир ва дустар иштирак гъахьнийи. Кюкйир дивбалан кьяляхъ, азадвал гъабхи Эскрин гюмбетдихъ фестиваль ачмиш апIбан митинг кебгънийи, хъа Поэзияйин театриъ «Лизи кьарнийирин дих» литературайин гюрюшар кIули гъушнийи.
Фестиваль гьар йисан Расул Гьямзатов бабкан гъахьи йигъан ккебгъри шулу. Думу ЮНЕСКО-йин лишниккди гъабхура. Фестивалин программайиинди серенжемар саки вари республикайиъ, гьадму гьисабнаан Хунзах райондиъ ерлешмиш дубхьнайи шаирин багъри ЦIада гъулаъ, ва лизи кьарнийириз ядигар дивнайи Гуниб гъулаъ кIули гъягъиди.
Сабпи ражари му фестиваль 1986-пи йисан кIули гъубхнийи. Думуган Расул Гьямзатовди думу серенжемар поэзияйин машкварси тешкил гъапIнийи. Расул Гьямзатовди «Лизи кьарнийирин Йигъар» ччвур тувнайи фестиваль инсаниятдин тарихнаъ гъахьи вари дявйириъ гъийиху эскрарин гьюрмат уьбхюри ва литературайин аьхю машкварси гьар йисан къайд апIуз кьаст гъапIнийи. Кьанди думу фестивализ илтIибкIну.
Гъи 30-тIан артухъ уьлкйирин шагьрариъ, дявйириан кьяляхъ дарфидар кIваинди гъитбан лишниккди, дявйир сарун текрар хьуз гъидритбан метлеб ади, лизи кьарнийирин лиж завуз тIибхурайи ядиграр дивна.
2023-пи йисан вари Урусатдиъ Расул Гьямзатовдин 100 йис къайд апIиди. Думу йис РФ-дин Президент Владимир Путиндин къарарниинди Расул Гьямзатовдин Йисси мялум дапIна.
