ЦIийи жюрейин сабсан библиотека ачмиш гъапIну

 

 

Каспийскдиъ «Культура» милли проектдин дахилнаъди, шагьрин тарихнаъ сабпиб, хъа республикайиъ – кьюбпиб вуди, гъийин деврин урхрударин вари тIалабариз жаваб тувру цIийи жюрейин библиотека ачмиш гъапIну.

 

РД-йин культурайин министерствойин пресс-гъуллугънаан мялум гъапIганси, Фазу Аьлиевайин ччвурнахъ хъайи Каспийск шагьрин му Кьялан библиотека гьамус гъийин деврин китабарин фонднахъди, мялуматарин цIийи технологйирик китIнайи компьютерарихъди тямин дапIнайи ва гъулайди албагнайи йишв гъабхьну. Библиотекайиъ интернет-зал, кинотеатр, жюрбежюр семинарар ва лекцйир гъахру майдан, ва гьацира урхрудари рягьятвал гъадабгъру йишв яратмиш дапIна. Мушваъ гьацира жюрбежюр выставкйир гъахуз, яратмиш’валин дарсар тешкил апIуз мумкинвалра гъабхьну.

Мидланра савайи, библиотекайиъ сагъламвалин терефнаан читин гьялнаъ айи бицIидаризра гъулай шартIар яратмиш дапIна: пандус, уларин рябкъювал зяиф дубхьнайидариз хусуси мурччв ва компьютерарихъди тямин дапIнайи тялукь йишвра ккабалгна.

Дупну ккундуки 2019-пи йислан башламиш дапIну, «Культура» милли проектдин дахилнаъди вари Урусатдиъ библиотекйир цIийи алаъбан аьхю ляхин кIули гъябгъюра. Гъи, вари цифрайиз дюнмиш апIурайи вахтна, аьдати библиотекйирин гьяракат зяиф дубхьна. Гьаддиз, жигьил насил библиотекйирихьан ярхла дархьбан бадали, дурарин маракьлувал жанлу апIбан метлеб ади, гьамусдиз ихь уьлкейин 44 региондиъ 134 библиотека цIийи алаъну. Бибилотекйирин цIийи жюрйир гизафси гъулариъ жанлуди тIаъра, фицики урусатдин библиотекйирикан 70 процент душвариъ ерлешмиш духьна. Гьацира дурар гъуларин агьалйириз ерийин мялуматар гъадагъуз шлу тек мяднар ва жямяаьтлугъ центрар ву. Проектдин сабпи натижйир рякъюз хъюгъна: 2020-пи йисан эвелариъ библиотекйириз, улихьна йисандин тялукь вахтнахь тевиш, 29,13 процентдин артухъ инсанар гъафну. Гележегдиъ проект чан метлебнахъ хъубкьур кIури, умуд кивдихьа.