«Уьру зонайиъ» ляхин апIури гъахьи ва коронавирусдин уьзриан ктIерццу агъзуртIан артухъ урусатдин медицинайин гъуллугъчйири ва аьлимари «Кьарнийир» кIуру илимдинна сагъламвал мюгькам апIбан комплексдиъ (НОК) рягьятвал гъадабгъну.
НОК «Кьарнийир» Мягьячгъала шагьрихьан 5 километр манзилнаъ Каспий гьюлин гъирагъдихъ ерлешмиш дубхьнайи, гьамусдин деврин тIалабариз жаваб тувру илимдинна сагъламвал мюгькам апIбан дарамат ву. Думу урусатдин аьлим Мягьямедов Мягьямед Гьябибовичдин жягьтлувалиинди тикмиш гъапIуб ва, илимдин цIийи ахтармишарна технологйир ишлетмиш апIури, сагъламвал мюгькам апIуз диш дапIнайиб ву.
22-пи сентябриъ «COVID-19-диин гъалиб хьпан ва дидин натижйир терг апIбан рякъяр» ччвур тувнайи вари халкьарин илимдинна тажрубайин конференцияйин дахилнаъди ва дюн’яйиъ сабпиб вуди Дагъустандиъ коронавирусдихъди женг гъабхурайи духтраризна аьлимариз бахш дапIнайи ядигар (шиклиъ) ачмиш гъапIну. Санаторийдин директор Мягьямед Мягьямедовди чан удучIвну улхбаъ къайд гъапIганси, мушваъ коронавирусдихъди женг гъабхурайи духтрари ва аьлимари чпин сагъламвал мюгькам апIуз диш дапIнайи рягьимлувалин акция гьяракатнаъ ади кьюд йискьан ву. Гъийин йигъаз дидкан 1500-дихьна касари мянфяаьт ктабгъну. Му акция неинки Дагъустандин, хъа гьацира вари Урусатдин, гележегдиъ – вари дюн’яйин духтрариз ва аьлимариз кайиб ву. Гьаци гьаму йисан санаторийдиъ Москвайиан, Санкт-Петербургдиан, Ростовдиан, Якутияйиан, Кавказдин республикйириан, Ставрополин ва Краснодарин краяриан, хъана жара регионариан духтрари ва аьлимари чпин сагъламвал мюгькам гъапIну.
Проектдин ляхин дюзди гъюруси ккабалгурайи Аьлибег Аьлиевдин гафариинди, му акцияйихьна харижи уьлкйирин аьлимарира чпин фикир жалб гъапIну, ва саспидари дидиз пулин кюмекра тувну.
«Учуз вари дюн’яйин аьлимар-медицинайин гъуллугъчйирихьан чпин разивал улупурайи йицIбариинди кагъзар гъюрачуз. Дурари гьюкуматарин арайиъ сяргьятар хъяркьнайивалиан чпихьан му акцияйиъ иштирак’вал апIуз даршулайивалин гьякьнаан гьяйифвал зигура. Эгер сяргьятар ачмиш гъапIиш, му акция вари халкьарин арайиъ кIули гъабхрубдиз илтIибкIуз ният айич», – къайд гъапIну Мягьямед Мягьямедовди.
«Учву вари дюн’яйиз нумуна улупунчва. Му гизаф важиблу жягьтлувал ву, фицики диди духтрариз чпин сагъламвализра фикир тувуб кIваин апIура. Акция вари халкьариз кайиб хьибди кIури, умудлу вуча», – бикIура кагъзариъ.
Рягьимлувалин му акция духтраризси, гьелелиг гьюкуматдин терефнаан чпин зегьметназ лайикьлу кьимат тувну адру аьлимаризна мялимаризра кайиб ву. Гележегдиъ санаторийдиъ кьабул апIрударин кьадар хъана яркьу апIбанди ву.
