2021-пи йисан 15-пи октябрилан 14-пи ноябризкьан, цифрайин технологйир ишлетмиш апIури, вари Урусатдин агьалйир сиягьназ гъадагъувалин ляхин кIули гъябгъиди. Уьлкейин лап ярхлаъ айи аьтрафариъ агьалйир сиягьназ гъадагъувалин ляхин 20-пи декабризкьан давам хьибди. Гьаму йисан гъабхру переписдин цIийивал гьадму вуки, агьалйириз чпин кIул’инди «Госуслуги» порталиъ переписдин электрондин кагъаз абцIуз мумкинвал тувра. Агьалйир гьисаб апIбан ляхниъ «Госуслуги» порталиъ, МФЦ-йиъ, гьацира хулаз гъюрайи гьисабар гъахурайидарихъди иштирак хьуз шулу.
Дагъустан Республикайиъ агьалйирин перепись апIбан ляхин кьюб йишваз пай гъапIнийи. Гьаци, 1-пи июлиан башламиш дапIну, 31-пи июлизкьан республикайин ярхла манзилнаъ ерлешмиш духьнайи 7 райондин гъулариъ агьалйирин перепись гъубхнийи, гьадму гьисабнаан Ахцигь, Докъузпара, Рутул, Тлярата, ЦIумада, ЦIунтIа районариъ ва Бежтайин участокдиъ. Вахт ккимиди туврайи мялуматариинди, душвариъ вари 76 агъзур кас гьисабназ гъадагъну.
Республикайин имбуну аьтрафариин 15-пи октябрилан 14-пи ноябризкьан агьалйир гьисаб апIбан ляхин кIули гъабхиди. Республикайин муниципалитетариъ 753 комиссия, 960 переписдин ва стационарный участокар, 5 агъзурилан зиина гьисабар гъахру участокар тешкил дапIна.
Къайд апIувал лазим вуки, Дагъустандиъ МФЦ-йин вари филиалариъ стационарный участокар тешкил апIиди ва «Йиз документар» центрарин электрондин нубат улупру мониторариъ видеороликар улупиди, агьалйирин гъуллугъар гьуркIру йишвариъ мялуматар тувру, гъаврикк ккаъру буклетар пай апIиди.
Республикайиъ агьалйир гьисаб апIбан ляхниина 600 волонтер жалб дапIна, дурари ватандашарихъди гъаврикк ккаъбан ляхин гъабхиди, МФЦ-йиъ ва перепись гъабхру участокариъ кюмек тувди.
Гьюрматлу ватанагьлийир! Уьлкейин агьалйир гьисаб апIбан ляхнин гъирагъдиъ мугъузанай, ичв ватандаш’валин буржи тамам апIинай. Ичв иштирак’валикан учву яшамиш шулайи йишван (шагьрин, гъулан) артмиш’вал асиллу ву. Фукьан гизаф инсанар му ляхниъ иштирак гъахьиш, суалариз дугъри жавабар тувиш, гьаддикан гьюкуматдин экономикайин, яшайишдин политикайин мянфяаьтлувал асиллу ву. Переписдин натижйир агьалйирин яшайишдин ери къайдайиз хувалин бина хьибди.
