Октябрин 14-пи йигъан Дагъустан Республикайин ургубпи дих апIбан Халкьдин Собраниейин 2-пи сессия кIули гъубшну.
Душваъ РФ-дин Президентдин СКФО-йиъ вари ихтиярар айи вакил Юрий Чайка, Федерацияйин Советдин председателии заместитель Андрей Яцкин, вахтназ вуди Дагъустандин Главайин вазифйир тамам апIурайи Сергей Меликов, Федерацияйин Советдин сенаторар, Дагъустандин терефнаан вуйи Госдумайин депутатар, жямяаьтлугъ ва диндин тешкилатарин вакилар иштирак гъахьну. Сессия РД-йин Халкьдин Собраниейин председатель Заур Аскендеровди ачмиш гъапIнийи. Дугъу сессияйиъ гьял апIуз Дагъустан Республикайин Глава ктагъувалин месэла адабгънийи.
Сессияйиъ РФ-дин Президентдин СКФО-йиъ вари ихтиярар айи вакил Юрий Чайкайи Дагъустандин Главайин гъуллугъниина улупнайи кандидатар ктухнийи: Самир Аьбдулхаликьов, Камил Давдиев, Сергей Меликов.
Дурарикан сарпирди Самир Аьбдулхаликьов, хъасин Камил Давдиев удучIвну гъулхнийи. Дурари депутатар чпин программйирихъди таниш гъапнийи.
Шубурпирди республикайин главайин гъуллугъниина кандидатди улупнайи Сергей Меликовдиз гаф тувнийи. Дугъу, учв республикайин главади ктагъиш, кIули гъахуз ккайи ляхнарикан ктибтнийи.
Сергей Меликовди дагъустанлуйирин уьмриъ алахьурайи варитан учIру месэлйир – бицIи маважибар, газдин, электроэнергияйин, марцци штун кьитвал, хъархъас марцц апIбахъди аьлакьалуди арайиз дуфнайи месэлйир, ЖКХ-йин гъурулушар табиаьтдин ужудар дару гьавйирихьна гьязурди дарувал ва гь. ж. за гъапIнийи. Дугъан гафариинди, ктуху месэлйир хъайи-хъайиси гьял апIури гъахьундар. Гьамус думу месэлйир лазим вуйиси гьял апIувал республикайин гьюкмарин улихь дийибгъна.
Сергей Меликовди республикайиъ коррупцияйихъди женг гъабхбан месэла экстремизмдихъди ва терроризмдихъди гъабхурайи аькси женгнахъди саб жергейиъ дивра. «Инсанар вижнасузваликан, гьюкумдрарин вижнасузваликан инжик духьна», – гъапнийи дугъу.
Сергей Меликов удучIвну улхбан кьяляхъ, 10 дакьикьайин танафус мялум гъапIнийи. Хъасин депутатари сесер тувуз хъюгънийи.
Сергей Меликовдихъанди 82 депутатди чпин сесер тувну, думу Дагъустан Республикайин Главади ктагъну. Имбуну кандидатарихъанди кью-кьюб сес тувнийи.
«Табасарандин нурар» газатдин редакцияйи, Сергей Меликов республикайин Главади ктагъувалихъди тебрик апIури, дугъаз гьаму читин ва жавабдар гъуллугъниин ляхин апIуз мюгькам сагъ’вал, ляхниъ хъуркьувалар ккун апIура. Гъит дагъустанлуйириз багарихьди гъюрайи йисар лапра мублагъдар ишри.
