21-пи октябриъ ихь республикайиъ Дагъустандин культурайин ва чIаларин Йигъ къайд гъапIну.

 

Дагъустандин Глава Сергей Меликовди республикайин агьалйир Дагъустандин культурайин ва чIаларин Йигъахъди тебрик гъапIну.

«Гьаму ужуб машкври ухьуз варидариз жвуван ччивар, арха-хира наънан вуш, багъри Ватандин тарих аьгъяди хьувалин, бабкан гъахьихъан мина ухьуз тувнайи кьиматлу, чав ихь ата-бабйирин аьсрарин зигьимлувалин девлет ва рюгьнан ирс уьбхюрайи бабан чIалниин дамагъ апIувалин важиблуваликан кIваина хура. Гизаф миллетарикан ибарат вуйи Дагъустандин халкь, наслар чиб-чпик мюгькамди китIри, сатIи апIурайиб гьадму ву.

«Инсанарин юкIвар сатIиди вуш, чIалар жарадар вушра баладар»,– гъапну ихь машгьур Расул Гьямзатовди, чав яратмиш апIуз хъюгъхъан мина бабан чIалар аьгъю апIбан важиблуваликан, Ватандиз вафалу вуйи ватанперверар тербияламиш апIбаъ чIаларин кьиматлуваликан улхури.
Дагъустандин халкьарин чIалар уьрхювал, аьгъю ва артмиш апIувал гьюкмин органарин ва жямяаьтлугъдин ляхнин асас тереф ву. Аргъаж шулайи насил дагъустан халкьарин рюгьнан кьиматлуваларихъди таниш апIувал, гизаф чIалар айи ихь уьмуми макан уьбхювал ухькан асиллу шула. Дагъустандин фольклорин девлетариин, машгьур классикарин эсерариин биналамиш духьну, ухьу чIалнан дюзвалин ва улхбан культурайин месэлйир гьял дапIну ккунду.
СатIи вуйи кьувватариинди ихь республикайин чIалнан ва культурайин кьадарсузвал, гизаф миллетарикан ибарат вуйи ихь уьлкейин жигьил насларин тербияйиз ужуб тясир апIру терефар уьрхюз шул кIури, умудлу вуза.
Учвуз ислягьвал, хушбахтвал, Дагъустан ва вари Урусат бадали, ужудар ляхнариъ гьарган хъуркьувалар ккун апIураза»,

– дупна республикайин кIулиъ айирин тебрикнаъ.