COVID-19-дихъди женг гъабхбан республикайин Оперативный штабдин нубатнан заседаниейиъ, уьзрихъди аьлакьалу гьял читин шулайивализ лигну, аьлава уьлчмйир кьабул дапIну ккуниваликан гъапнийи. Гьаци, 28-пи октябрилан башламиш дапIну, жюрбежюр серенжемар кIули гъахурайи бязи йишвариз гъягъюз ихтияр хьпан бадали, QR-кодарин гъурулуш ляхник кипра.
Оперштабди къарар адабгъганси, санитарвалинна эпидемиологияйин гьял ужувлахъинди дигиш хьайиз, йишвну сяаьт 11-диан гвачIниндин сяаьт 8-диз, хулариз ипIруб хьади гъягъру ва рякъяриъ, аэропортариъ, вокзалариъ жямяаьтлугъ ипIру-убхърубдихъди тямин апIру тешкилатарин ляхин ктарди, агьалйирин ипIру-убхърубдин игьтияжар гьуркIрайи идарйирин ляхин дебккди. МФЦ-йин ляхинра, улупнайи кьадартIан артухъ агьалйир сабишв’инди кьабул дарапIбан къайдйир уьрхюри, давам хьибди.
28-пи октябрихъан кинотеатрарин, театрарин, концертарин заларин инсанар деъру йишвар 50%-тIан артухъ (уьмуми кьадар 150 кастIан гизаф дарди) адрацIбан ва 18 йислан зиина яшар айи касари вакцинация апIбакан мялуматар кайи QR-код ясана 72 сяаьт мидиз улихьна ПЦР-тест тувбакан ва думу марцциди удубчIвбакан справка, вая аьхиримжи 6 вазлин муддатнаъ коронавирусдиан аьзарлу хьпакан справка улупиштIан, зализ дедретбан гьякьнаан къарар адабгъну.
Гьаму къайдйир уьрхюри, 28-пи октяб-рихъан, физкультурайин, спортдин, выставк-йир гъахбан, аьгъювалар тарагъбан ва жара серенжемар тешкил апIбан бадали, 7 йигъ ккимиди Роспотребнадзорин республикайин управлениейиз серенжемдин гьякьнаан хабар тувну, маскйир алахьбан ва сар-сарихьан ярхлади дийигъбан къайдйир ижмишнаан дюрхну ккунду.
30-пи октябрихъан гостиницайин гъуллугъарикан мянфяаьт ктабгъуз, алвер апIбан тадарукарин дару 400 кв.м. йишв айи центрариз, жямяаьтлугъ ипIру-убхърубдихъди тямин апIру бицIи ва аьхю тешкилатариз гъягъюз, физкультурайин, спортдин, фитнес-центрарин, косметологияйин ва жара салонарин, аквапаркарин, бассейнарин гъуллугъар анжагъ QR-код улупиштIан гьуркIуз хьибдар.
Республикайин агьалйир коронавирусдиз аькси рубар йивувалихьна жалб апIбан бадали, прививка апIбан кьяляхъ, идарйири ва карханйири чпин гъуллугъчйириз маважибра хътадабтIди, рягьятвал гъадабгъру кьюд йигъ тувбан гьякьнаан къарар адабгъну.
Вари ляхин дарапIру йигъарира республикайин аьтрафариин рубар йивбан пунктар ляхник хьиди.
