Гьамусяаьт Табасаран райондиъ «Хючна-Халагъ» рякъ рас апIура. Учу мидин гьякьнаан газатдиъ мялуматарра тувнийча. Хючнаан Акъа гъулаз вуйи рякъра гьадму рякъюк кабхъра. Му рякъ’ин асфальт улубзбан ляхнар фициб дережайихъна дуфнаш аьгъю апIбан бадали, узу «Табасаран райондин ДТП-№33» АО-йин аьхюну инженер Уьсман Аьлимирзаевдихъди гюрюшмиш гъахьнийза.
«Хючнаан Халагъна гъябгъюрайи рякъю 13 гъул Таба-саран райондин центрихъди сатIи апIура. Гьамусяаьт гьязурлугвалин ляхнар кIули духна: рякъ яркьу дапIна, шид гъябгъбан бадали, архар хъирчна, ктахьру йишвар марцц дапIна, рякълан 2000 кубометрин руг алдабгъна. Хючнаан Акъа гъулаз гъябгъру рякъюн шубуб километрин манзилнаъ расвалин ляхнар гъахуз 2021-пи йисан июлин вазлиъ хъюгънийи. Гьамусяаьт, асфальт улубзуз рякъюн диб мюгькам апIбан бадали, 30% жяргъялра капIну, гъумна жвилли кIикIил кибикьнайиб (уьмуми кьадар 804 кубометр жвилли кIикIил ва 345 кубометр жяргъял кади) рякъ’ин алабхьунча.
КIул’инди вари рякъ гъадабгъиш, гьамусяаьт гъумна жвилли кIикIил ва гъумна жяргъял кибикьну алабхьну, 17400 квадратдин метр рякъ гьязур дапIна. Думу ляхнар тамам апIуз 1852 кубометр жвилли кIикIил ва 193 кубометр жяргъял лазим гъабхьну. Му хъасин асфальт улубзбан ляхнар гъахуз диб хьибди.Гьацдар ляхнар тамам апIбан бадали, ургуб жюрейин техника либхура.
Рякъилан шид алдапIбан бадали, рякъюн 2-пи ва 3-пи километрариъ 68 метрин манзилнаъди 500 миллиметр айи турбйир ккирчна.
Гьацира гьадму ляхнарихъди сатIиди Цалак гъулан Мягьямедовдин ччвурнахъ хъайи кючейиъ рякъюн гъирагъдихъди инсанар гъягъюз 920 метрин манзилнаъ тротуарарра апIура. Душвакк гъван ккабхьбан ляхнарин аьхюну пай тамам дапIна.
Му ляхнар ккудукIбан кьяляхъ, мархьар гъургъиган рякъюн гъирагъдихъди шид гъябгъбан бадали, асбестдинна цементдин 400 ва 500 миллиметр айи турбйир ккирчбанди ву.
Магьа 8-пи ноябриъ Гюгьрягъ гъул’ан Дагъни гъулазди гъюрайи рякъ’ин асфальт улубзуз хъюгъну. Дидин кьяляхъ Дагънизди асфальт улубзу рякъхъан исинди Хючназди му ляхнар давам апIиди.
Гьаму вари ляхнар 2021-пи йисан аьхириз, цIийи йис ккебгъайиз, ккудукIбанди ву», – ктибтнийи узуз ич сюгьбатнаъ Уьсман Аьлимирзаевди.
