Ноябрин 9-пи йигъан Дербентдиъ РД-йин Глава Сергей Меликовдин регьберваликкди Дагъустан Республикайин Главайин багахь хьайи стратегияйин артмиш’валин ва проектарин ляхнин Советдин заседание кIули гъубшнийи. Душваъ гьял гъапIу месэлйирикан саб – «Дербент шагьур» шагьрин округ» муниципалин образованиейин аьтрафарин сатIи вуйи артмиш’вал» РД-йин госпрограмма уьмриз кечирмиш апIувал вуйи.
Шагьрин администрацияйи гьаму терефнаан гъийин йигъаз дапIнайи ляхникан улхури, Сергей Меликов Дербентдиъ тикмиш апIурайи кьалу шид марцц апIру гъурулушдин месэлайиин жаради дийигъну. Думу жюре гъурулуш адрували региондин экология-йиз зарар тувра, шагьур инвестицйирин кюмекниинди артмиш хьувализ манигъ’вал апIура. Шагьрин «Кьибла» бицIи район артмиш апIувалра важиблу ву. Думу терефнаъ жямяаьтлугъ ва социальный объектар тикмиш апIувал планламиш дапIна. Гьаддихъди сабси, Сергей Меликовди агьалйирин хуларин багахь хьайи аьтрафар къайдайиз хувализ, «Ватанпервер» парк тикмиш апIувализ ужуб кьимат тувну. Дугъу тялукь министерствйириз сифте паркдин аьтрафариин ерлешмиш шлу ва яракьдиан йивбар апIбан майдандиъ дивру тириз лазим вуйи алатар, авадлугъар масу гъадабгъбан, хъасин «Игитарин гьюжат» талитар гъахру майдан ккабалгувалин месэлйир гьял апIувал табшурмиш гъапIну.
Шагьриъ госпрограмма уьмриз кечирмиш апIбан гьякьнаан доклад хьади Дербентдин мэр Рустамбег Пирмягьямедов удучIвну гъулхнийи. Дугъан гафариинди, 2019-2020-пи йисари шагьриъ коммунальный, социальный, транспортдин инфраструктура тикмиш, гьацира рас апIбан ляхнар хъуркьувалиинди тамам дапIна: 140 бицIириз йишв айи бицIидарин багъ тикмиш, бицIидарин 8 багъ ва 4 мектеб капитально рас дапIна, 10 мектебдиъ тамшир апIру майднар албагна, Мамедбеговдин ччвурнахъ хъайи кюче лап уткан къайдайиз дубхна, думу кючейикан, шагьрин агьалйирси, гъафи хяларра эргвал йивуз уч шлу йишв дубхьна.
Р.Пирмягьямедовди къайд гъапIганси, гьаму йисан 2020-пи йисхъан мина гъахурайи зиихъ ктуху ляхнариз 5 миллиард манат харж дапIна, багарихьди шагьрин «Кьибла» бицIи райондин гьацIкьялаъ жюрбежюр динар хъаърударин сатIиди вуйи центр тикмиш апIбанди ву.
Совещаниейин натижйириз лигну, Сергей Меликовди тялукь министерствйирин иштирак’валиинди Дербентдин артмиш’валин гьякьнаан РД-йин госпрограммайин серенжемар тартиб апIувал табшурмиш гъапIну.
